Sharafudheen: ఐటీ జాబ్ వదిలి సినిమాల్లోకి: ఆ ఒక్క నిర్ణయం.. ఈ హీరో లైఫ్నే మార్చేసింది

ఒక సాధారణ మధ్య తరగతి కుటుంబం నుంచి వచ్చిన అబ్బాయి.. సినిమా ఇండస్ట్రీలో అడుగుపెట్టి సక్సెస్ సాధించడమే కాకుండా తనదైన గుర్తింపు సంపాదించుకున్నాడు. అతను స్క్రీన్ మీద కనపడితే ఎలాంటి హంగూ, ఆర్భాటం ఉండదు. కానీ తన టైమింగ్‌‌, నేచురల్ యాక్టింగ్‌‌తో ప్రేక్షకుల మనసులో ప్రత్యేకమైన చోటు దక్కించుకున్నాడు. అతని పేరు షరాఫుద్దీన్. మలయాళంలోని గ్రేట్ యాక్టర్స్ పేర్ల లిస్ట్ చెప్తే వాళ్లలో మొదటి వరుసలో ఉంటాడు షరాఫ్​. రీసెంట్​గా నివిన్ పౌలీ నటించిన ‘ప్రతిఛాయ’ మూవీలో మరోసారి తన పర్ఫార్మెన్స్​తో ఆడియెన్స్​ను మెస్మరైజ్ చేశాడు.

కేరళలోని ఎర్నాకుళం ప్రాంతంలో పెరిగిన షరాఫుద్దీన్ చిన్నప్పటి రోజులు చాలా సాధారణంగా గడిచాయి. ఇంట్లో చదువు మీదే ఎక్కువ దృష్టి. మంచి ఉద్యోగం సాధించాలన్నదే మెయిన్ గోల్. చిన్నప్పుడు సినిమాలంటే ఇష్టం ఉన్నా అది కెరీర్ అవుతుందని పెద్దగా ఆలోచించలేదు. స్కూల్‌‌లో సరదాగా జోక్స్​ వేస్తూ ఫ్రెండ్స్‌‌ను నవ్వించడం, యాక్టర్స్​ని ఇమిటేట్ చేయడం లాంటివి చేసేవాడు. కానీ ఆ టైంలో “నేను నటుడిని అవుతా” అనే ప్లాన్ మాత్రం లేదు అంటాడు షరాఫ్​. 

లైఫ్ సెట్ అనిపించిన టైమ్

ఇంజినీరింగ్ పూర్తి చేసి ఐటీ ఉద్యోగంలో చేరిన తర్వాత జీవితం ఒక లైన్‌‌లో సెట్ అయినట్టు కనిపించింది. మంచి జీతం, రొటీన్ జీవితం, సెక్యూరిటీ ఉన్న కెరీర్. కానీ లోపల మాత్రం ఇంకో కోణం నడుస్తోంది. సినిమాల వైపు ఒక ఆకర్షణ మెల్లగా పెరుగుతూ వచ్చింది. ‘‘ఆ టైంలో బయటకు చూస్తే లైఫ్ క్లియర్‌‌గా ఉన్నట్టు ఉంటుంది. కానీ లోపల మాత్రం ఇంకో దిశకు వెళ్లాలనే ఆలోచన ఉండేది” అని తన మనసులోని మాటల్ని ఓ సందర్భంలో పంచుకున్నాడు. 

సినిమా ప్రపంచంలోకి అడుగు 

సినిమా రంగంలోకి షరాఫ్​ అసిస్టెంట్ డైరెక్టర్‌‌గా అడుగు పెట్టాడు. ఇది అతని జీవితంలో పెద్ద టర్నింగ్​ పాయింట్​. సెట్స్ మీద పని చేస్తూ సినిమా ఎలా తయారవుతుందో దగ్గరనుంచి చూశాడు. నటన మాత్రమే కాదు, ప్రతి చిన్న డీటైల్ ఎంత కష్టమో అర్థం చేసుకున్నాడు. ఇక్కడే ఒక విషయం స్పష్టమైంది. పెద్దగా బ్యాక్‌‌గ్రౌండ్ లేకపోయినా అవకాశం దొరికితే మార్గం తెరుచుకుంటుంది అని నమ్మేవాడు. 

ఒక్క పాత్రతో మారిన లైఫ్​

2015లో వచ్చిన “ప్రేమమ్” అతని జీవితాన్ని పూర్తిగా మార్చేసింది. అందులో అతను చేసిన ‘గిరిరాజన్ కోళి’ పాత్ర చిన్నదే. కానీ, ప్రేక్షకుల్లో పెద్ద ఇంపాక్ట్ పడింది. ఆ పాత్ర తర్వాతే తనకు నిజమైన గుర్తింపు వచ్చింది. ఒక చిన్న కామెడీ క్యారెక్టర్ కూడా ప్రేక్షకులను ఎంతగా కనెక్ట్ చేయగలదో అప్పుడు అర్థమైంది. ఆ సినిమా తర్వాత పదే పదే ఫోన్ మోగడం మొదలైంది. కొత్త అవకాశాలు వచ్చాయి. కానీ అన్ని పాత్రలు హీరో స్థాయిలో మాత్రం రాలేదు. దాదాపు చాలా సినిమాల్లో చిన్న పాత్రలే. కొన్ని కామెడీ రోల్స్, కొన్ని సపోర్టింగ్ క్యారెక్టర్స్. ఇక్కడే అతని సహనానికి పరీక్ష ఎదురైంది. ఫేమ్ వచ్చింది కానీ స్థిరంగా లేదు. అయినా ప్రతి పాత్రను సీరియస్‌‌గా తీసుకున్నాడు. చిన్నదైనా దాన్ని గుర్తుండేలా చేయడమే లక్ష్యంగా పెట్టుకున్నాడు.

ఇమేజ్ బ్రేక్ చేసిన పాత్ర

కెరీర్‌‌లో పెద్ద మలుపు “వరతన్” సినిమాతో వచ్చింది. అప్పటివరకు కామెడీ పాత్రల్లో కనిపించిన అతను, ఒక్కసారిగా సీరియస్, నెగెటివ్ షేడ్ ఉన్న పాత్రలో కనిపించాడు. ప్రేక్షకులు షాక్.. “ఇతనేనా ఇదంతా చేసినది?” అనే రియాక్షన్ వచ్చేసింది. అదే అతనికి పెద్ద ప్లస్ అయింది. ఇక్కడే అతని ఇమేజ్ మారింది. కేవలం కామెడీ మాత్రమే కాదు, వేరే షేడ్స్ కూడా చేయగల నటుడు అనే గుర్తింపు వచ్చింది. తర్వాత వచ్చిన సినిమాలు అతని రేంజ్‌‌ను పెంచాయి. పెద్ద సినిమాల్లో భాగమయ్యాడు. స్టార్ క్యాస్ట్ మధ్య కూడా తన ప్రెజెన్స్ చూపించాడు. అతని నటనలో ఒక సహజత్వం ఉంటుంది. చిన్న ఎక్స్‌‌ప్రెషన్స్‌‌తోనే సీన్ నిలబెడతాడు. 

ఇప్పుడు షరాఫుద్దీన్ మలయాళ సినిమాల్లో ఒక గుర్తింపు ఉన్న నటుడు. సపోర్టింగ్ రోల్స్ నుంచి కీలక పాత్రల వరకు అవకాశాలు వస్తున్నాయి. అతని ప్రయాణం చూస్తే ఒక విషయం స్పష్టంగా కనిపిస్తుంది. స్థిరత్వం ఒక్కసారిగా రాదు. క్రమంగా వస్తుంది. అవకాశాలను ఎలా ఉపయోగించుకుంటామన్నదే ముఖ్యం అని. ఐటీ ఉద్యోగం నుంచి సినిమా సెట్స్ వరకు, చిన్న కామెడీ పాత్రల నుంచి బలమైన పాత్రల వరకు షరాఫుద్దీన్ ప్రయాణం చాలా సింపుల్‌‌గా కనిపిస్తుంది. కానీ ఆ సింప్లిసిటీ వెనుక ఓపిక, ప్రయత్నం, కష్టపడి నిలబడిన రోజులు ఉన్నాయి. సినిమా ప్రపంచంలో నిలబడాలంటే పెద్ద ప్రారంభం అవసరం లేదు. సరైన టైంలో సరైన అవకాశం పట్టుకుంటే చాలు అని చెప్తోంది షరాఫుద్దీన్ జర్నీ.

ఒకే జోనర్‌‌లో ఇరుక్కోలేదు

షరాఫుద్దీన్ కెరీర్‌‌లో ఒక ప్రత్యేకత ఉంది. ఒకే జోనర్‌‌లో ఇరుక్కోలేదు. కామెడీ చేసినా అది సహజంగా ఉంటుంది. సీరియస్ పాత్ర చేసినా అదే స్థాయిలో ప్రభావం చూపిస్తుంది. ప్రతి పాత్ర కొత్త పాఠం లాంటిది. ఒకే స్టైల్‌‌లో ఉండటం తనకు ఇష్టం లేదు. వ్యక్తిగత జీవితం విషయానికొస్తే ‘సింపుల్‌‌గా ఉండటమే తన స్టైల్’ అంటాడు. ఫేమ్ వచ్చినా అతని జీవితం పెద్దగా మారలేదు.

సింపుల్‌‌గా ఉండటం అతని స్వభావం. స్టార్‌‌డమ్ కంటే పని మీదే ఎక్కువ దృష్టి పెడతాడు. కొత్త పాత్రలు, కొత్త అనుభవాలు ఇవే అతని ఆసక్తి. బయట ప్రపంచంలో గుర్తింపు ఉన్నా, లోపల మాత్రం ఇంకా నేర్చుకోవాల్సింది చాలా ఉందనే ఆలోచనలో ఉంటాడు. అందుకే “నేను ఇంకా నేర్చుకుంటున్న నటుడిని” అంటాడు. ప్రతి డైరెక్టర్ దగ్గర కొత్త విషయం నేర్చుకోవచ్చని అతని నమ్మకం. ప్రతి సినిమా కొత్త క్లాస్ లాంటిదని భావిస్తున్నాడు. అలాగే చేసేది పెద్ద పాత్ర లేదా చిన్న పాత్ర కాదు, దాన్ని ఎలా చేస్తామన్నదే అసలు విషయం అనే క్లారిటీ ఉన్న నటుడు.