- వెయిటింగ్ లిస్ట్ పేషెంట్లు మాత్రమే
- సూపరింటెండెంట్ఉషారాణి
పద్మారావు నగర్, వెలుగు : గాంధీ దవాఖానలో చేరుతున్న రోగులను సనత్నగర్లోని టిమ్స్ కు తరలించి అక్కడ ట్రీట్మెంట్ చేయించాలంటూ వైద్యారోగ్య శాఖ ఉన్నతాధికారుల మౌఖిక ఆదేశాలు ఇచ్చారని గాంధీ వైద్య విద్యార్థులు ఆరోపించారు. దీనికి నిరసనగా జూనియర్ డాక్టర్లు, పీజీ విద్యార్థులు గాంధీ మెయిన్ బిల్డింగ్ వద్ద శుక్రవారం ఆందోళన నిర్వహించారు.రాష్ట్ర జూనియర్ డాక్టర్ల అసోసియేషన్ లీడర్ డాక్టర్ రాజ్ కుమార్ జాదవ్ మాట్లాడుతూ గాంధీలో అడ్మిట్ అయిన రోగులను ఇక్కడి డాక్టర్లు, పీజీ విద్యార్థులే స్వయంగా టిమ్స్కు తీసుకెళ్లి అక్కడ చికిత్స చేసి తీసుకురావాలన్న నిబంధనను వ్యతిరేకిస్తున్నట్టు చెప్పారు. రోగులకు మెరుగైన వైద్యం అందించాలని అనుకుంటే గాంధీలోనే మౌలిక వసతులను అభివృద్ధి చేయాలని సూచించారు. ఈ నిర్ణయాన్ని ఉపసంహరించుకోవాలని, లేకపోతే ఆందోళన ఉధృతం చేస్తామని హెచ్చరించారు.
అది నిజం కాదు : సూపరింటెండెంట్
జూనియర్ డాక్టర్ల ఆరోపణలను గాంధీ దవాఖాన సూపరింటెండెంట్ డాక్టర్ ఉషారాణి తోసిపుచ్చారు. సనత్నగర్లోని టిమ్స్ లేటెస్ట్ ఆపరేషన్ థియేటర్లతో కూడిన హై-ఎండ్ సూపర్ స్పెషాలిటీ దవాఖాన అని, అక్కడ అత్యాధునిక వసతులున్నాయని చెప్పారు. గాంధీలో సర్జరీల కోసం వెయిటింగ్ లిస్ట్ ఎక్కువగా ఉన్న సందర్భాల్లో, ఆ భారాన్ని తగ్గించి రోగులకు సత్వర చికిత్స అందించేందుకు వీలుగా టిమ్స్లో కేవలం ఒక ఆపరేషన్ థియేటర్ను మాత్రమే గాంధీ దవాఖానకు కేటాయించారని స్పష్టతనిచ్చారు.
