మహిళా దినోత్సవం వచ్చేసింది. జబ్బలు చరుచుకుంటూ మహిళల అభివృద్ధి కోసం ఊకదంపుడు ఉపన్యాసాలను దంచికొడుతున్నాం. సమానత్వం ఇవ్వాలని, వాళ్లతోనే దేశాలు అభివృద్ధి చెందుతాయని కోట్ల గళాలు నినదిస్తున్నాయి. మరి, ఆ గళ నినాదాలు నిజం అవుతున్నాయా? అంటే అబ్బే లేదంటోంది ఐక్యరాజ్యసమితి. ఏ ఏడాదికి ఆ ఏడాది ఉపన్యాసాలతోనే సరిపెడుతున్నాం తప్ప, సమానత్వం కోసం చేస్తున్న పనులు, తీసుకుంటున్న చర్యలు సరిపోవట్లేదంటోంది. ఒక్కరోజు ఉపన్యాసాలకే పరిమితమైపోతున్నాయి తప్ప, మహిళలకు సమానత్వమన్నది అందట్లేదని వాపోయింది. ఆ దేశం, ఈ దేశం కాదు.. అసలు ఏ దేశమూ ఆమెకు సమానత్వాన్ని ఇవ్వలేకపోయిందని ఆవేదన చెందింది. మహిళల సమానత్వం కోసం 25 ఏళ్ల క్రితం చేసుకున్న బీజింగ్ డిక్లరేషన్ను సమర్థంగా అమలు చేయలేకపోతున్నామని వెల్లడించింది. జాబ్లు, రాజకీయాలు, ఆరోగ్యం, చదువు వంటి విషయాల్లో సరైన హక్కులకు మహిళలు నోచుకోలేకపోతున్నారని వెల్లడించింది. ‘జెండర్ ఈక్వాలిటీ: 25 ఏళ్ల బీజింగ్ డిక్లరేషన్ లో మహిళల హక్కులు’ పేరిట యూఎన్ వుమెన్ రిపోర్టును విడుదల చేసింది. ప్రపంచ వ్యాప్తంగా మహిళల పరిస్థితిని కళ్లకు కట్టింది. 
