హైదరాబాద్ లో వీధి కుక్కల బెడద రోజరోజుకి తీవ్రమవుతోన్న సంగతి తెలిసిందే. ఒంటరిగా బయటకు రావాలంటే బయపడాల్సిన పరిస్థితి ఏర్పడింది. ఈ క్రమంలో జనవరి 8న జీహెచ్ఎంసీ హెడ్డాఫీసులో మేయర్ గద్వాల విజయలక్ష్మీ, అడిషనల్ కమిషనర్ స్నేహ శబరీశ్, వెటర్నరీ అధికారులు, హై లెవెల్ కమిటీ సభ్యులైన కార్పొరేటర్లతో సమీక్షించారు. సిటీలో వీధి కుక్కల బెడద నివారణకు అన్ని చర్యలు తీసుకుంటున్నామని తెలిపారు. ఈ మేరకు శేరిలింగంపల్లిలో ఎకరం విస్తీర్ణంలో వీధి కుక్కలకు ప్రత్యేక షెల్టర్ను ఏర్పాటు చేస్తామన్నారు.
వీధి కుక్కల బెడద నుంచి జనాలను రక్షించడానికి హై లెవెల్ కమిటీ సూచన మేరకు చర్యలు తీసుకున్నట్లు తెలిపారు విజయలక్ష్మి. కుక్కలకు స్టెరిలైజేషన్, యాంటి బర్త్ కంట్రోల్ (ఏబీసీ) చర్యలు తీసుకుంటామన్నారు. వీధి కుక్కలకు రెగ్యులర్గా రేబిస్ వ్యాక్సిన్ అందించేందుకు వెటర్నరీ అధికారులు చర్యలు తీసుకోవాలని ఆదేశించారు. . ప్రచార మాధ్యమాల ద్వారా అవగాహన కల్పించాలని హై లెవెల్ కమిటీ సభ్యులు సూచించారు.
జోన్ల వారీగా సమీక్షించాలని, కుక్కలకు మంచినీరు, సమయానికి ఫీడింగ్ అందించాలన్నారు. మటన్, చికెన్ షాపుల నుంచి వచ్చే వ్యర్థాలను ఖాళీ స్థలంలో పారవేయకుండా డస్ట్ బిన్లో వేసేలా చర్యలు తీసుకోవాలన్నారు వెటర్నరీ అడిషనల్ కమిషనర్ చీఫ్ ఎప్పటి కప్పుడు క్షేత్ర స్థాయి అధికారులతో సమీక్ష చేసి చర్యలు తీసుకోవాలని మేయర్ ఆదేశించారు.
