ముల్లాన్పూర్: అఫ్గానిస్తాన్తో మొదలైన ఏకైక టెస్ట్లో తొలి రోజే టీమిండియా పట్టు బిగించింది. కెప్టెన్ శుభ్మన్ గిల్ (143 బాల్స్లో 11 ఫోర్లు, 1 సిక్స్తో 103 బ్యాటింగ్), కేఎల్ రాహుల్ (165 బాల్స్లో 11 ఫోర్లతో 100) సెంచరీల మోత మోగించడంతో.. గురువారం టాస్ గెలిచి బ్యాటింగ్కు దిగిన ఇండియా తొలి ఇన్నింగ్స్లో 85 ఓవర్లలో 368/3 స్కోరు చేసింది. ఆట ముగిసే సమయానికి గిల్తో పాటు రిషబ్ పంత్ (50 బ్యాటింగ్) క్రీజులో ఉన్నాడు. అఫ్గాన్ బౌలర్లలో మహ్మద్ సలీమ్ రెండు వికెట్లు తీశాడు.
జైస్వాల్ ఫెయిల్..
ముందుగా బ్యాటింగ్కు దిగిన ఇండియా ఓపెనర్లలో రాహుల్ మెరుగ్గా ఆడినా.. యశస్వి జైస్వాల్ (24) ఫెయిలయ్యాడు. అఫ్గాన్ బౌలర్ల నుంచి పెద్దగా ప్రతిఘటన లేకపోయినా.. జైస్వాల్ ఎక్కువ సేపు వికెట్ కాపాడుకోలేకపోయాడు. చకచకా బౌండ్రీలు బాదినా.. 12వ ఓవర్లో సలీమ్ వేసిన బాల్ను ఫైన్ లెగ్ దిశగా మళ్లించే ప్రయత్నంలో కీపర్కు క్యాచ్ ఇచ్చాడు.
దాంతో తొలి వికెట్కు 41 రన్స్ పార్ట్నర్షిప్ ముగిసింది. ఈ దశలో వచ్చిన సుదర్శన్ (104 బాల్స్లో 13 ఫోర్లతో 81) స్టార్టింగ్లోనే ఇచ్చిన క్యాచ్ను స్లిప్లో రెహమానుల్లా గుర్బాజ్ వదిలేశాడు. అదే క్రమంలో 37 రన్స్ వద్ద జియావుర్ రెహమాన్ వేసిన బాల్ రాహుల్ బ్యాట్ను తాకుతూ కీపర్ చేతుల్లోకి వెళ్లినా.. ప్లేయర్లు అప్పీలు చేయలేదు.
దాంతో కేఎల్కు అదృష్టం కలిసొచ్చింది. తర్వాత పుంజుకున్న రాహుల్ క్లాసిక్ డ్రైవ్స్తో ఆకట్టుకున్నాడు. పేసర్లను సమర్థంగా ఎదుర్కొన్న సుదర్శన్ స్పిన్ బౌలింగ్లో కాస్త తడబడ్డాడు. ఈ ఇద్దరి నిలకడతో ఇండియా 96/1 స్కోరు చేసింది.
సుదర్శన్ సెంచరీ మిస్..
రెండో సెషన్లో ఇండియా ఆధిపత్యమే ఎక్కువగా నడిచింది. రాహుల్, సుదర్శన్ క్లాసిక్ డ్రైవ్స్తో ఆకట్టుకున్నారు. ముఖ్యంగా సుదర్శన్ మిడ్ వికెట్ రీజియన్లో 13 ఫోర్లు బాదాడు. పేసర్ సలీమ్ను టార్గెట్ చేసి కొట్టిన స్ట్రయిట్ డ్రైవ్ అతని బ్యాటింగ్లో ప్రత్యేక ఆకర్షణగా నిలిచింది. రెండో ఎండ్లో రాహుల్ కూడా ఫుల్ కాన్ఫిడెన్స్తో బ్యాటింగ్ చేశాడు.
అఫ్గాన్ బౌలర్లకు ఎలాంటి చాన్స్ ఇవ్వకుండా మంచి డిఫెన్స్తో పాటు బలమైన గ్రౌండ్ షాట్లు కొట్టాడు. దాంతో 67 బాల్స్లో ఫిఫ్టీ పూర్తి చేశాడు. హాఫ్ సెంచరీ తర్వాత మరింత జోరు పెంచిన సుదర్శన్ వరుస బౌండ్రీలతో హోరెత్తించాడు. ఇక రెండో వికెట్కు 139 రన్స్ జోడించిన ఈ జంటను టీ బ్రేక్కు ముందు సలీమ్ విడదీశాడు. హాఫ్ వ్యాలీ బాల్ను కవర్ డ్రైవ్ కొట్టే క్రమంలో సుదర్శన్ కీపర్కు చిక్కాడు. తర్వాత వచ్చిన గిల్ వేగంగా ఆడటంతో టీ బ్రేక్కు ఇండియా 209/2 స్కోరు చేసింది.
సెంచరీల మోత..
టీ బ్రేక్ తర్వాత గిల్, రాహుల్ స్కోరు బోర్డును మరింత వేగంగా ముందు తీసుకెళ్లారు. గిల్ క్లాస్ షాట్లతో ఆకట్టుకుంటే రాహుల్ మాస్ షాట్లతో ముందుకెళ్లాడు. దాంతో ఈ జోడీని విడదీసేందుకు అఫ్గాన్ బౌలర్లు ఎన్ని ప్రయత్నాలు చేసినా ఫలించలేదు. కవర్, స్ట్రయిట్ డ్రైవ్స్తో అలరించిన రాహుల్ 164 బాల్స్లో కెరీర్లో 12వ సెంచరీని అందుకున్నాడు.
అయితే 61వ ఓవర్లో జియావుర్ రెహమాన్ (1/61).. రాహుల్ను ఔట్ చేసి మూడో వికెట్కు 67 రన్స్ భాగస్వామ్యాన్ని ముగించాడు. ఈ టైమ్లో వచ్చిన పంత్ ఈజీగా బ్యాటింగ్ చేశాడు. గిల్తో పోటీపడి ఫోర్లు రాబట్టాడు. అద్భుతమైన టైమింగ్తో ఆడిన గిల్ ఓ భారీ సిక్సర్తో 138 బాల్స్లో 11వ సెంచరీని పూర్తి చేశాడు. పంత్తో కలిసి నాలుగో వికెట్కు అజేయంగా 121 రన్స్ జత చేసి మరో వికెట్ పడకుండా రోజును ముగించాడు.
