ప్రఖ్యాత దర్శకుడు ఎస్.ఎస్.రాజమౌళి తెరకెక్కించిన ‘ఆర్ఆర్ఆర్’ మూవీ మరో ఘనతను సొంతం చేసుకుంది. ఖ్యాతి గడించిన ‘గోల్డెన్ గ్లోబ్ అవార్డ్స్’ కోసం రెండు కేటగిరీల్లో ఈ సినిమా నామినేట్ అయ్యింది. బెస్ట్ నాన్ ఇంగ్లిష్ ల్యాంగ్వేజ్ ఫిల్మ్ విభాగంలో ‘ఆర్ఆర్ఆర్’ ఎంట్రీ సాధించింది. ఇక బెస్ట్ ఒరిజినల్ సాంగ్ విభాగంలోనూ ‘ఆర్ఆర్ఆర్’ మూవీలోని ‘నాటు నాటు’ సాంగ్ నామినేట్ అయింది.
‘నాన్ ఇంగ్లిష్ ల్యాంగ్వేజ్ ఫిల్మ్’ కేటగిరీలో నామినేట్ అయిన మిగతా నాలుగు సినిమాల జాబితాలో ఆల్ క్వైట్ ఆన్ ది వెస్టెర్న్ ఫ్రంట్ (జర్మనీ), అర్జెంటీనా 1985 (అర్జెంటీనా), క్లోజ్ (బెల్జియం), డెసిషన్ టు లీవ్ (సౌత్ కొరియా) ఉన్నాయి. ఈ నాలుగింటిలో ఒక దానికి ‘నాన్ ఇంగ్లిష్ ల్యాంగ్వేజ్ ఫిల్మ్’ కేటగిరిలో గోల్డెన్ గ్లోబ్ అవార్డును జనవరి 10న ప్రకటించనున్నారు. భారత కాలమానం ప్రకారం జనవరి 11న వేకువ జామున అమెరికాలోని లాస్ ఏంజెలెస్ లో గోల్డెన్ గ్లోబ్ అవార్డుల ప్రదానోత్సవం జరగనుంది. ప్రఖ్యాత కమేడియన్ జెరాడ్ క్యార్మికేల్ ఈ కార్యక్రమానికి హోస్ట్ గా వ్యవహరించనున్నారు.
భారత స్వాతంత్ర్య విప్లవ యోధులు కొమరం భీం, అల్లూరి సీతారామ రాజుల జీవితాల నేపథ్యంలో ‘ఆర్ఆర్ఆర్’ సినిమాను నిర్మించారు. ఇందులో అల్లూరి సీతారామరాజు పాత్రను హీరో రాంచరణ్, కొమరం భీం పాత్రను జూనియర్ ఎన్టీఆర్ పోషించారు. ఆలియా భట్, అజయ్ దేవ్ గణ్, శ్రియా శరణ్ లతో పాటు బ్రిటీష్ నటులు రే స్టీవెన్సన్, ఆలిసన్ డూడీ కూడా ఇందులో కీలక పాత్రల్లో నటించారు.
