- ప్రయాణికులకు తప్పు దారి చూపించి తిప్పలు
- ట్విట్టర్ ద్వారా గూగుల్ పై విరుచుకుపడ్డ బాధితులు
ఏదైనా కొత్త చోటుకు వెళ్లాలంటే ఏం చేస్తారు? అదేం పిచ్చి ప్రశ్న.. చేతిలో స్మార్ట్ ఫోన్ ఉంచుకుని అంటారా. కావొచ్చు. అయినా చెప్పండి. ‘ఏముందోయ్.. గూగుల్ మ్యాప్స్లో చూసుకుని, మెల్లగా అక్కడికి చేరుకుంటాం’ ఇదే మీ సమాధానమైతే ఒక్కసారి ఈ స్టోరీ చదవండి. కెనడాలోని అరోరాకు చెందిన ఓ వందల మంది యువకుల బృందం కార్లలో ట్రిప్కు బయల్దేరింది. వాళ్లందరూ డెన్వర్ ఎయిర్ పోర్టుకు వెళ్లాలని మ్యాప్స్లో దారి చూసుకున్నారు. తీరా సగం దూరం వెళ్లాక.. మెయిన్ రూట్ను యాక్సిడెంట్ వల్ల మూసేశారని అర్థమైంది.
మ్యాప్స్ మరో మార్గాన్ని చూపించడంతో దాన్ని వెంబడి ప్రయాణించడం మొదలుపెట్టారు. వెళ్లారు.. వెళ్లారు.. వెళ్లారు.. ఎంతసేపు పోయినా.. ఎయిర్ పోర్టు మాత్రం రావడం లేదు. కొన్ని గంటల తర్వాత ఓ బురద రోడ్డు వచ్చింది. అయినా ముందుకుసాగారు. చివరకు పొలాలు రావడంతో ఆగిపోయారు. ఎటు పోవాలో అర్థం కాలేదు. కొన్ని కార్లు బంకమట్టిలో ఇరుక్కుపోయి కదల్లేదు. దీంతో వెనక్కు తిరిగి ఎలా వెళ్లాలో దిక్కుతోచలేదు.
గూగుల్ మ్యాప్స్ యాప్లో వచ్చిన చిన్న సమస్యే దీనికి కారణమని తెలుస్తోంది. ఈ యువకులు మాత్రమే కాకుండా చాలా మంది మ్యాప్స్లో వచ్చిన సమస్య వల్ల ఇబ్బందులపాలయ్యారు. మట్టిలో ఇరుక్కుపోవడం వల్ల చాలా మంది కార్లకు రిపేర్లు అయ్యాయి. దీంతో ట్విట్టర్ ద్వారా గూగుల్పై పలువురు విరుచుకుపడ్డారు. మీరు చాలా తప్పులు ఒకేసారి చేయగలరంటూ హేళన చేశారు.