‘బైకర్’ చిత్రంలోని మ్యూజిక్ చాలా కొత్తగా ఉంటుందని, రేసింగ్, ఫ్యామిలీ ఎమోషన్స్ స్ట్రాంగ్గా ఉంటాయని మ్యూజిక్ డైరెక్టర్ జిబ్రాన్ అన్నాడు. శర్వానంద్ హీరోగా అభిలాష్ రెడ్డి కంకర దర్శకత్వంలో యూవీ క్రియేషన్స్ సంస్థ నిర్మించిన ఈ చిత్రం ఏప్రిల్ 3న విడుదలవుతోంది. ఈ సందర్భంగా జిబ్రాన్ మాట్లాడుతూ ‘శర్వానంద్ గారి ‘రన్ రాజా రన్’ సినిమాతోనే నేను ఇక్కడ మ్యూజిక్ డైరెక్టర్గా పరిచయం అయ్యాను. మళ్లీ ఇన్నాళ్లకు ఈ సినిమాతో మంచి కం బ్యాక్ వస్తుందని నమ్ముతున్నా. సినిమాలో ఎనిమిది పాటలు ఉన్నాయి. అందులో ఒకటి పూర్తి పాటగా ఉంటుంది.
మిగతావి మాంటేజ్ సాంగ్స్. రేసింగ్ సన్నివేశాల్లో బైక్స్ నుంచి వచ్చే సౌండ్స్ చాలా ఎక్కువగా ఉంటాయి. ఆ సౌండ్స్ వల్ల మ్యూజిక్ వినిపించకుండా పోకూడదు. అందుకే కొత్త టెక్నాలజీ ఉపయోగించి బ్యాక్గ్రౌండ్ స్కోర్, సౌండ్ ఎఫెక్ట్స్ అన్నీ బ్యాలెన్స్గా ఉండేలా చేశాం. అలాగే ఈ మూవీ మేకింగ్ హాలీవుడ్ లెవల్లో ఉంటుంది.
కేవలం రేసింగ్, యాక్షన్ మాత్రమే కాదు, చాలా స్ట్రాంగ్ ఫ్యామిలీ ఎమోషనల్ కంటెంట్ కూడా ఉంది. క్రీడాకారుడైనా, రేసర్ అయినా అతనికి ఒక ఫ్యామిలీ ఉంటుంది. ఆ ఫ్యామిలీలో ఉండే ఎమోషన్స్ ఇందులో చాలా ప్రత్యేకంగా ఉంటుంది. యూత్తో పాటు ఫ్యామిలీ ఆడియెన్స్ కూడా ఈ సినిమాను ఇష్టపడతారు’ అని చెప్పాడు.
