న్యూఢిల్లీ: కొన్ని రకాల కంపెనీలు ఫ్రాక్షనల్ షేర్లు జారీ చేయడానికి సెబీ, కేంద్ర ప్రభుత్వం సానుకూలంగా ఉన్నట్లు సమాచారం. గత కొన్నేళ్లుగా రిటైల్ ఇన్వెస్టర్ల పార్టిసిపేషన్ పెరుగుతుండటంతో, దీనికి మరింత ఊపు తెచ్చేందుకు ఈ సానుకూలత సాయపడనుందని సీనియర్ ఆఫీసర్ ఒకరు వెల్లడించారు. హై–వాల్యూ షేర్లను రిటైల్ ఇన్వెస్టర్లను కొనుగోలు చేయడానికి ఫ్రాక్షనల్ షేర్ల మెకానిజం వీలు కల్పిస్తుంది. ఫలితంగా లిక్విడిటీ కూడా పెరుగుతుందని ఆ ఆఫీసర్ పేర్కొన్నారు. ఈ విషయంపై ఇప్పటికే సెబీ, మినిస్ట్రీ ఆఫ్ కార్పొరేట్ అఫైర్స్‌ ( ఎంసీఏల) మధ్య డిస్కషన్ జరిగిందని, సెబీ త్వరలో డిటెయిల్డ్ ప్రెజెంటేషన్ ఇస్తుందని వివరించారు. ఫ్రాక్షనల్ షేర్లను తేవాలంటే కంపెనీల చట్టానికి సవరణలు చేయాల్సి ఉంటుంది.
లిస్టెడ్, అన్లిస్టెడ్ కంపెనీలు రెండింటికీ ఒకేవిధమైన రూల్స్ ఉండొచ్చని, లిస్టెడ్ కంపెనీలకు ఫ్రాక్షనల్ షేర్ల మెకానిజం బాగా కలిసి వస్తుందని సీనియర్ ఆఫీసర్ చెప్పారు. ఎంఆర్ఎఫ్, హనీవెల్ ఆటోమేషన్, పేజ్ ఇండస్ట్రీస్ వంటి కంపెనీల షేర్లు ఎక్కువ విలువతో ట్రేడవుతున్నాయి. దీంతో ఇలాంటి షేర్లను చాలా మంది రిటైల్ ఇన్వెస్టర్లు కొనుగోలు చేయడానికి అవకాశం ఉండటం లేదు. ఫ్రాక్షనల్ షేర్స్ మెకానిజం తీసుకు వస్తే అలాంటి అధిక వాల్యూ షేర్లను సైతం రిటైల్ ఇన్వెస్టర్లు కొనుగోలు చేయడం సాధ్యపడుతుంది. ఈ ఆలోచనతోనే ఫ్రాక్షనల్ షేర్స్ మెకానిజం పట్ల సెబీ, ఎంసీఏలు సానుకూలత చూపిస్తున్నాయి. కెనడా, జపాన్, అమెరికా వంటి దేశాలలో ఫ్రాక్షనల్ షేర్స్ మెకానిజం ఎప్పటి నుంచో అమలులో ఉంది.
