- సుమారు రూ.20 లక్షల ఆస్తినష్టం
- రంగారెడ్డి జిల్లా కొండకల్ లో ఘటన
శంకర్ పల్లి, వెలుగు: షార్ట్ సర్క్యూట్ తో కిరాణ షాపు సామగ్రి కాలిపోగా.. రూ. లక్షల్లో ఆస్తినష్టం జరిగింది. బాధితుడు తెలిపిన ప్రకారం.. శంకర్పల్లి మండలం కొండకల్లో గణపతిరెడ్డి కొన్నేండ్లుగా కిరాణ షాపు నిర్వహిస్తున్నాడు. గురువారం రాత్రి షాపు బంద్చేశాడు. శుక్రవారం తెల్లవారుజామున 4 గంటల సమయంలో ప్రమాదవశాత్తు షార్ట్ సర్క్యూట్తో షాపులో మంటలు చెలరేగాయి. స్థానికులు చూసి గణపతి రెడ్డికి చెప్పగా.. ఆయన వెంటనే100కు కాల్ చేశాడు.
ఆ ప్రాంతం తమ పరిధిలోకి రాదంటూ గచ్చిబౌలి, మాదాపూర్, పటాన్చెరు, శంకర్పల్లి స్టేషన్ల పోలీసులు కాలయాపన చేశారు. దీంతో బాధితుడు స్థానికులతో కలిసి నీటిని చల్లి మంటలను ఆర్పారు. అనంతరం ఫైర్ సిబ్బంది రాగా.. గ్రామస్తులు ఆగ్రహం వ్యక్తం చేశారు. షాపు కాలిపోగా.. సుమారు రూ. 20 లక్షల మేర ఆస్తి నష్టం జరిగిందని, ప్రభుత్వం ఆదుకోవాలని బాధితుడు వాపోయాడు. మోకిల పీఎస్లో కంప్లయింట్ చేయగా కేసు నమోదు చేశారు.
