అతనో పోలీస్.. శాంతి భద్రతలనే కాదు.. అత్యవసర పరిస్థితుల్లో లా అండ్ ఆర్డర్ పరిరక్షించాల్సిన అధికారి. ఫుల్ గా మందుకొట్టి.. తన కారులో ఇష్టానుసారం వెళుతూ.. ఓ సైకిల్ పై వెళుతున్న వ్యక్తిని ఢీకొట్టాడు. ఇదేమని ప్రశ్నించిన స్థానికులపై వీరంగం చేశాడు. పోలీసులు డ్రంక్ అండ్ డ్రైవ్ టెస్ట్ చేయగా.. ఎవడ్రా నన్ను ఆపింది.. ఎందుకు ఆపారు రా అంటూ ఎదురుదాడి చేశాడు. నడిరోడ్డుపై.. కారు డోర్లు ఓపెన్ చేసి.. తాగిన మత్తులో.. సిగరెట్లు కాలుస్తూ.. హంగామా చేశాడు ఈ పోలీస్. పూర్తి వివరాల్లోకి వెళితే..
గుజరాత్ లోని సర్ఖేజ్-గాంధీనగర్ హైవేపై తొమ్మిది మంది ప్రాణాలను బలిగొన్న ఘోర ప్రమాదం నేపథ్యంలో గుజరాత్ రాష్ట్రం మొత్తం అప్రమత్తమైంది. అతివేగం, మద్యం తాగి వాహనాలు నడపడంపై అధికారులు కఠిన చర్యలు తీసుకుంటుండగా, రాజ్‌కోట్‌లో మరో విషాదకర సంఘటన వెలుగులోకి వచ్చింది. సౌరాష్ట్ర యూనివర్శిటీ గేట్ సమీపంలో జరిగిన ఈ విచిత్రమైన సంఘటనలో, మద్యం మత్తులో ఉన్న పోలీసు సబ్-ఇన్‌స్పెక్టర్ (పీఎస్‌ఐ) జూలై 30న సైకిల్‌పై వెళ్తున్న యువతిని ఢీకొట్టాడు. ఈ ప్రమాదంలో విద్యార్థిని గాయపడగా ఆమె సైకిల్ కూడా పాడైంది. ఇంతలో స్థానికులు జోక్యం చేసుకొని డ్రైవర్‌ను అదుపులోకి తీసుకోవడంతో పీఎస్‌ఐ నిర్లక్ష్యపు చర్యలు వెలుగులోకి వచ్చాయి.
జర్నలిస్ట్ గగన్‌దీప్ సింగ్ ట్విట్టర్‌లో పోస్ట్ చేసిన వైరల్ ఈ వీడియోలో.. నిందితుడు పిఎస్‌ఐ లక్ష్మీనారాయణ వ్యాస్‌గా గుర్తించారు. ఈ అధికారి సిగ్గు లేకుండా ధూమపానం చేస్తూ కనిపించాడు. ఈ సంఘటన గురించి స్థానిక అధికారులకు తెలియజేయడానికి ముందు ప్రత్యక్ష సాక్షులు గాయపడిన విద్యార్థిని వెంటనే సమీపంలోని ఆసుపత్రికి తరలించారు. పీఎస్‌ఐ వ్యాస్ మద్యం మత్తులో వాహనం నడుపుతున్నాడని ఆరోపిస్తూ విద్యార్థి అన్నయ్య యూనివర్సిటీ పోలీస్ స్టేషన్‌లో అధికారికంగా ఫిర్యాదు చేయడంతో పరిస్థితి తీవ్రమైంది. చట్టాన్ని అమలు చేసే అధికారులే ఇలా ట్రాఫిక్ నిబంధనలను ఉల్లంఘించడంతో.. సామాన్య పౌరులు ట్రాఫిక్ నిబంధనలను ప్రశ్నిస్తూ.. ఆగ్రహం వ్యక్తం చేశారు.
ఈ ఘటనపై స్పందించిన రాజ్‌కోట్ పోలీసులు.. మద్యం మత్తులో ఉన్న పీఎస్‌ఐని అదుపులోకి తీసుకున్నారు, సాక్షుల సత్వర చర్యతో అతడిని అధికారులకు అప్పగించారు. ఆరోపణలు ఎదుర్కొంటున్న అధికారి భుజ్ పోలీస్ స్టేషన్‌లో పనిచేస్తున్నట్లు సమాచారం. గుజరాత్ పోలీసులు ప్రజల భద్రతకు తమ నిబద్ధతను పునరుద్ఘాటించారు. ఇటువంటి సంఘటనలను తేలికగా తీసుకోబోమని పేర్కొన్నారు. "చట్టానికి ఎవరూ అతీతులు కాదు. మా స్వంత అధికారులైనా ఈ విషయాన్ని క్షుణ్ణంగా విచారించి తగిన చర్యలు తీసుకుంటాం" అని సీనియర్ పోలీసు అధికారి హామీ ఇచ్చారు.
गुजरात के राजकोट में पुलिस कि दबंगई आई सामने पुलिस वाले ने शराब के नशे में पुलिसकर्मी ने एक्सीडेंट किया उसके बाद कार में बैठकर सिगरेट पीने लगा। pic.twitter.com/5ti1byKFft
— Gagandeep Singh (@GagandeepNews) July 31, 2023
