ఈ మధ్య ట్రాఫిక్ పోలీసోళ్లు హెల్మెట్ లేకుండా బైక్ నడుపుతున్నందుకు జాకిర్ను పట్టుకున్నరు. కొత్త చట్టంలో ఉన్న రూల్స్ ప్రకారం వెయ్యి రూపాయల ఫైన్ వేసేందుకు సిద్దమైన్రు. అయితే ‘మార్కెట్లో ఉన్న ఏ హెల్మెట్లో కూడా నా తల పడ్తలేద’ని జాకిర్ చెప్పిన మాట విన్న పోలీసోళ్లు అక్కడున్న కొంత మంది హెల్మెట్లు తీసుకొచ్చి జాకిర్ తలకు పెట్టేందుకు ట్రై చేసిన్రు. ఎవరి హెల్మెట్ కూడా పట్టలేదు. దీంతో ‘అవును.. ఆయన చెబుతున్నది కూడా నిజమే’నని ఒప్పుకున్నరు. ‘హెల్మెట్ దొరకనప్పుడు నువ్వేం చేస్తవ్.. పో’ అని ఫైన్ వేయకుండనే వదిలిపెట్టిన్రు.
ట్రాఫిక్ పోలీసోళ్లు ఒక్కసారంటే వదిలిపెట్టిన్రు. అందరు అట్ల వదిలేస్తరని లేదు కదా..? కొంతమంది ‘మాకు అనవసరం.. నువ్వు హెల్మెట్ పెట్టుకోలేదు. జరిమానా కట్టాల్సిందే’నని చెప్తే ఏం చేయాల? ఫొటోలు తీసి ఆన్లైన్ల చలాన్ పెడితే కట్టక తప్పదు కదా? అని జాకిర్ బాధపడ్తున్నడు. తన తలకాయ పట్టే హెల్మెట్ ఎక్కడైనా దొరుకుతదా అని కనిపించిన ప్రతి షాప్కు వెళ్తున్నడు. ఇప్పటిదాక ఏ దుకాణంలో కూడా జాకిర్కు హెల్మెట్ దొరకలేదట.
‘కొత్తగా తీసుకొచ్చిన చట్టం అంటే నాకు కూడా గౌరవమే. నిబంధనలను పాటించడానికి సిద్ధమే. నా దగ్గర అన్ని పేపర్లు ఉన్నయ్. లైసెన్స్, ఇన్సూరెన్స్ చూపించినా కూడా పోలీసోళ్లు హెల్మెట్ గురించే అడుగుతున్నరు. ఆపిన ప్రతిసారి నా బాధంతా చెప్పుకోవాల్సి వస్తోంది. అయితే సూరత్లో కస్టమ్స్ హెల్మెట్లు తయారు చేసే దుకాణం ఉన్నదని తెలిసింది. అక్కడి నుంచి నాకు సరిపోయే హెల్మెట్ను తెచ్చుకోవాలని అనుకుంటున్న. అప్పటిదాక బైక్ బయటకు తీయొద్దని అనుకుంటున్న’– జాకిర్ మామన్