రామచంద్రుడి జన్మస్థలమైన అయోధ్య(Ayodhya)లో రామాలయ(Ram Mandhir) ప్రారంభోత్సవ కార్యక్రమానికి సర్వం సిద్ధమైంది. జనవరి 22న జరుగనున్న ఆ మధుర క్షణాలు ఆస్వాధించేందుకు దేశ ప్రజలంతా వేయికళ్లతో ఎదురుచూస్తున్నారు. పెద్ద సంఖ్యలో భక్తులు అయోధ్యకు చేరుకుంటున్నారు. ఈ అపురూపమైన సమయంలో ఇటీవల విడుదలైన హనుమాన్ సినిమా సంచలనంగా మారింది. శ్రీరామ భక్తుడు హనుమంతుని కథతో వచ్చిన ఈ సినిమా.. బాక్సాఫీస్‌ వద్ద భారీ కలెక్షన్స్ రాబడుతోంది.
ఇక ఈ సినిమా విడుదల సమయంలో హనుమాన్ చిత్ర నిర్మాత ఒక గొప్ప నిర్ణయం తీసుకున్నారు. ఈ సినిమాకు సంబంధించిన ప్రతి టికెట్‌పై రూ.5 అయోధ్య రామమందిరానికి విరాళంగా ఇవ్వనున్నట్లుగా ప్రకటించారు. అలా హనుమాన్ ప్రీమియర్ షోల కోసం 2,97,162 టిక్కెట్లు విక్రయించగా వచ్చిన డబ్బుల నుండి రూ.14,85,810 చెక్కును ఇప్పటికే రామ్ మందిరానికి అందజేశారు. ఆ తర్వాత ఇవాళ్టి(జనవరి 21) వరకు 53,28,211 టిక్కెట్ల అమ్ముడవగా.. అందులో రూ.2,66,41,055 రామ్ మందిరానికి అందిస్తున్నట్లు తాజాగా ప్రకటించారు. దీంతో హనుమాన్ మూవీ టీమ్ పై సర్వత్రా ప్రశంసలు దక్కుతున్నాయి.
ఇక హనుమాన్ సినిమా విషయానికి వస్తే.. ప్రపంచవ్యాప్తంగా ఈ సినిమా ఇప్పటివరకు రూ. 150 కోట్లకు పైగా గ్రాస్ కలెక్షన్స్ రాబట్టి.. రూ. 200 కోట్ల వైపు దూసుకుపోతుంది. మరో రెండు మూడు రోజుల్లో ఈ మార్కును ఈజీగా దాటేయనుంది ఈ మూవీ. ఇప్పటికే చాలా చిత్ర బ్రేకీవెన్ సాధించిన ఈ సినిమా ట్రిపుల్ బ్లాక్ బస్టర్ గా నిలిచింది హనుమాన్ మూవీ.
