ఎల్ బీ నగర్, వెలుగు: సోషల్ మీడియాలో ఓ మహిళకు అసభ్యకర చిత్రాలను పోస్ట్ చేస్తూ వేధింపులకు గురి చేస్తున్న ఓ సాఫ్ట్వేర్ ఉద్యోగిని రాచకొండ సైబర్ క్రైమ్ పోలీసులు అరెస్ట్ చేశారు. పోలీసులు తెలిపిన వివరాల ప్రకారం.. ఆంధ్రప్రదేశ్ నెల్లూర్ జిల్లా గోకనపాలెంకు చెందిన సంగన్న వెంకటరమణ రెడ్డి(24) కాలేజీ రోజుల్లో తన క్లాస్ మెట్ ను ప్రేమించాడు. కానీ ఆ యువతికి మరో వ్యక్తితో పెళ్లయింది. యువతి హైదారాబాద్ కు వచ్చి తన భర్తతో కలిసి హస్తినాపురంలో ఉంటూ ఓ కంపెనీలో అకౌంటెంట్ గా పని చేస్తోంది. ఈ క్రమంలో నగరానికి వచ్చిన వెంకటరమణారెడ్డి మియాపూర్ లోని ఓ సాఫ్ట్ వేర్ కంపనీలో పని చేస్తున్నాడు. కాలేజీ రోజుల్లో ప్రేమించిన యువతిని అప్పుడప్పుడు కలిసేవాడు. ఈ క్రమంలో యువతికి, వెంకటరమణరెడ్డికి మధ్య గొడవ జరిగింది. అప్పటి నుంచి అతడిని దూరం పెట్టడంతో ఆమెకు అసభ్యకర మెసేజ్ లు పంపుతూ, తన వద్ద ఉన్న పర్సనల్ ఫొటోలు ఆమె భర్తకు స్నేహితులకు వాట్సాప్ ద్వారా పంపాడు. దీంతో బాధితురాలు సైబర్ క్రైమ్ పోలీసులకు ఫిర్యాదు చేశారు. పోలీసులు దర్యాప్తు చేసి నిందితుడిని భరత్ నగర్ లో అరెస్ట్ చేశారు. అతడి నుంచి సెల్ ఫోన్ స్వాధీనం చేసుకున్నారు. సైబర్ క్రైమ్ ఇన్స్పెక్టర్ జలందర్ రెడ్డి మాట్లాడుతూ సెల్ఫీలకు యువత దూరంగా ఉండాలని సూచించారు.
