తెలంగాణ రైజింగ్‌‌‌‌‌‌‌‌ గ్లోబల్‌‌‌‌‌‌‌‌ సమిట్కు భారీ బందోబస్తు

• 2,500 మంది పోలీసులతో కట్టుదిట్టమైన భద్రత 
• సమిట్ నిర్వహణ కమిటీతో రాచకొండ సీపీ సమీక్ష 

మల్కాజిగిరి, వెలుగు: రంగారెడ్డి జిల్లా మహేశ్వరంలోని మీర్​ఖాన్​పేటలో డిసెంబర్ 8, 9 తేదీల్లో జరిగే తెలంగాణ రైజింగ్ గ్లోబల్ సమిట్​కు పోలీసు శాఖ భారీ బందోబస్తు ఏర్పాటు చేస్తున్నది. సీఎం రేవంత్​రెడ్డి ఆధ్వర్యంలో జరిగే ఈ అంతర్జాతీయ సమిట్​కు 2,500 మంది పోలీసులు, లా అండ్ ఆర్డర్, ట్రాఫిక్, స్పెషల్ బ్రాంచ్, ఇంటెలిజెన్స్, అక్టోపస్, గ్రేహౌండ్స్, డాగ్ స్క్వాడ్, బాంబ్ స్క్వాడ్​తో కట్టుదిట్టమైన భద్రత అమలు చేస్తున్నారు. 

భద్రతా ఏర్పాట్లకు సంబంధించి శుక్రవారం మహేశ్వరంలో రాచకొండ సీపీ సుధీర్ బాబు, కలెక్టర్ నారాయణ రెడ్డి, టీజీఐసీసీ ఎండీ శశాంక్, మహేశ్వరం డీసీపీ నారాయణ రెడ్డి, వాటర్ వర్క్స్ ఎండీ అశోక్ రెడ్డి, ట్రాఫిక్ డీసీపీలు, నిర్వహణ కమిటీ సభ్యులతో సమన్వయ సమావేశం నిర్వహించారు. ఈ మీటింగ్​లో పలు అంశాలపై చర్చించారు. సమిట్​కు అంతర్జాతీయ పెట్టుబడి సంస్థల ప్రతినిధులు, బహుళ సంస్థల అధినేతలు, దేశీయ సంస్థల ప్రముఖులు, పారిశ్రామిక దిగ్గజాలతో కలిపి సుమారు 600 మంది ప్రతినిధులు హాజరుకానున్నట్టు అధికారులు తెలిపారు. 

వీరికి సహాయక సిబ్బందిగా మరో మూడు వేల మంది రానుండగా, వీఐపీ ప్రతినిధుల చుట్టూ మూడంచెల భద్రత ఉంటుందన్నారు. సమిట్ జరిగే ప్రాంతంలో అడుగడుగునా నిఘా పెట్టేందుకు సుమారు వెయ్యికిపైగా సీసీటీవీ కెమెరాలను ఏర్పాటు చేస్తున్నామని చెప్పారు. ట్రాఫిక్​కు అంతరాయం కలుగకుండా ఆయా మార్గాల్లో పటిష్టమైన పోలీసు బందోబస్తు ఉంటుందని అధికారులు తెలిపారు.   రెండు రోజుల పాటు ఆయా మార్గాల్లో మళ్లింపులు ఉంటాయని అధికారులు పేర్కొన్నారు.