హైదరాబాద్, వెలుగు : హోంగార్డులను రెగ్యులైజ్ చేయాలని, వారికి టైంకు జీతాలివ్వాలని సీఎం కేసీఆర్ను కాంగ్రెస్ ఎమ్మెల్సీ జీవన్ రెడ్డి డిమాండ్ చేశారు. ఆత్మాహుతికి యత్నించిన హోంగార్డు రవీందర్ కుటుంబాన్ని అన్ని విధాలుగా ఆదుకోవాలన్నారు. రూ.10 లక్షలు ఆర్థిక సాయం చేయాలని కోరారు. బుధవారం ఆయన సీఎంకు లేఖ రాశారు. ఏండ్లతరబడి హోంగార్డులుగా సేవలందించి సర్వీసు కాలంలో మృతిచెందిన వారి కుటుంబాలకు కారుణ్య నియామకాలను కల్పించడం లేదన్నారు. దీంతో ఆ కుటుంబాలు రోడ్డునపడే పరిస్థితి ఏర్పడుతున్నదని ఆవేదన వ్యక్తం చేశారు.
హెూంగార్డులు కానిస్టేబుళ్లతో సమానంగా విధులు నిర్వహిస్తున్నప్పటికీ కానిస్టేబుళ్లు పొందుతున్న రిటైర్మెంట్ బెనిఫిట్స్ ఏవీ కూడా హెూంగార్డులకు అందడంలేదని పేర్కొన్నారు. రిటైర్ అయిన తర్వాత వాళ్లు ఇబ్బందులు ఎదుర్కొంటున్నారన్నారు. ఎలాంటి ప్రోత్సాహకాలూ ఇవ్వకపోగా టైంకు జీతాలు కూడా ఇవ్వకపోతుండడంతో హైదరాబాద్ చాంద్రాయణగుట్ట ట్రాఫిక్ పోలీస్ స్టేషన్లో పనిచేస్తున్న హోంగార్డు రవీందర్ బ్యాంకులో తీసుకున్న లోన్ను చెల్లించలేకపోయాడు. దీంతో ఆవేదన చెంది ఆత్మాహుతికి యత్నించినట్లు తెలిపారు. హోంగార్డులను పర్మినెంట్ చేస్తామన్న సీఎం కేసీఆర్ తన హామీని నిలబెట్టుకోవాలని డిమాండ్ చేశారు.