హాంకాంగ్‌లోనూ కరోనా కేసుల సంఖ్య పెరిగిపోవడంతో అక్కడి ప్రభుత్వం నివారణ చర్యలు చేపట్టింది. దీంతో భారత్ నుంచి వచ్చే ఎయిరిండియా, విస్తారా విమానాలపై నిషేధం విధించింది. ఇటీవలే భారత్ నుంచి హాంకాంగ్ వచ్చిన కొందరు ప్రయాణికులకు కరోనా పాజిటివ్ అని స్పష్టం కావడంతో ఈ నిర్ణయం తీసుకుంది. ఈ నిషేధం అక్టోబరు 17 నుంచి 30 వరకు వర్తిస్తుంది. కరోనా వ్యాప్తి చెందటం మొదలయ్యాక ఎయిరిండియా విమానాలను హాంకాంగ్ నిషేధించడం ఇది మూడోసారి.
టాటా సియా విమానయాన సంస్థకు చెందిన విస్తారా విమానాలపై హాంకాంగ్ నిషేధం విధించడం ఇది మొదటి సారి. ఢిల్లీ నుంచి విస్తారా విమానాల ద్వారా హాంకాంగ్ వచ్చిన ప్రయాణికుల్లో కరోనా పాజిటివ్ వ్యక్తులు ఉన్నట్టు తేలింది. హాంకాంగ్ కరోనా మార్గదర్శకాల ప్రకారం ప్రయాణానికి 72 గంటల ముందు కరోనా టెస్టులు చేయించుకోవాల్సి ఉంటుంది. నెగెటివ్ ఉన్నవారు మాత్రమే హాంకాంగ్ కు వెళ్లేందుకు అర్హులు. దీనిపై ఎయిరిండియా వర్గాలు స్పందిస్తూ, కరోనా నెగెటివ్ సర్టిఫికెట్ ఉన్నవాళ్లు మాత్రమే హాంకాంగ్ లో ప్రవేశించేందుకు అర్హులు అని, విమాన ప్రయాణికుల టెస్టు రిపోర్టుల అంశంలో ఎయిరిండియా బాధ్యత వహించబోదని స్పష్టం చేశాయి.
