ఉత్తర్ప్రదేశ్లోని నోయిడా ట్విన్ టవర్స్ కూల్చివేతకు రంగం సిద్ధమైంది. మొత్తం 40 అంతస్తులతో కూడిన రెండు భారీ భవన సముదాయాలను ఆగస్టు 28న..3,700 కేజీల పేలుడు పదార్థాలతో కూల్చివేయనున్నారు. ఈ ట్విన్ టవర్స్ లో ఒకదాని పేరు ‘సియాన్’. ఇందులో 29 అంతస్తులు ఉన్నాయి. మరో టవర్ పేరు ‘అపెక్స్’. అందులో 32 అంతస్తులు ఉన్నాయి. కేవలం 9 సెకన్ల వ్యవధిలో ఈ ట్విన్ టవర్స్ మొత్తం నేలమట్టం కానున్నాయి.
ఈ ట్విన్ టవర్స్ కూల్చివేత కాంట్రాక్టును ఎడిఫైస్ ఇంజినీరింగ్ అనే కంపెనీకి అప్పగించారు. ఆగస్టు 13 నుంచి ఈ టవర్లలో పేలుడు పదార్థాలను అమర్చే ప్రక్రియ మొదలైంది. బ్లాస్టర్లు, ట్రెయిన్డ్ వర్కర్లు మొత్తం 40 మంది కలిసి నోయిడా ట్విన్ టవర్స్ లో పేలుడు పదార్థాలను అమర్చే ప్రక్రియను ఆగస్టు 13నే ప్రారంభించారు. ఆ పనులు సోమవారం సాయంత్రం పూర్తయ్యాయి. అన్ని అంతస్తుల్లోనూ దాదాపు 20వేల పేలుడు పదార్థాలను అమర్చారు. ఆగస్టు 26లోగా వాటన్నింటిని కనెక్ట్ చేసి సిద్ధంగా ఉంచుతారు. ఆగస్టు 28న మధ్యాహ్నం ఆ పేలుడు పదార్థాల కనెక్షన్లను రీ చెక్ చేస్తారు. 2.30 గంటలకు.. 20వేల పేలుడు పదార్థాల మెయిన్ కనెక్షన్ ను ఒక డిటోనేటర్ కు అనుసంధానించి రిమోట్ ద్వారా పేల్చేస్తారు. 9 సెకన్ల వ్యవధిలో.. రెప్పపాటు టైంలో ట్విన్ టవర్స్ నేలమట్టం అవుతాయి.
ఈనేపథ్యంలో ట్విన్ టవర్స్ కు అత్యంత సమీపంలో ఉన్న రెండు పెద్ద భవన సముదాయాల్లో నివసించే వారిని.. ఆగస్టు 28న ఉదయం 7 నుంచి తాత్కాలికంగా ఖాళీ చేయించనున్నారు. దీనిపై వారందరికీ ఇప్పటికే సమాచారాన్ని అందించారు. చుట్టుపక్క భవనాల కోసం ఎడిఫైస్ కంపెనీ ఇప్పటికే రూ.100 కోట్ల బీమా కవరేజీని కూడా తీసుకుంది. కాగా, ఈ ట్విన్ టవర్స్ ను నోయిడాలోని సెక్టార్ 93లో సూపర్ టెక్ లిమిటెడ్ అనే కంపెనీ నిర్మించింది. ఈ భవన సముదాయాలను నిబంధనలకు విరుద్ధంగా నిర్మించారంటూ పలువురు స్థానికులు 2009 సంవత్సరంలో కోర్టును ఆశ్రయంచారు. ఎన్నో ఏళ్లపాటు ఈ విచారణ కొనసాగగా.. స్థానికుల ఆరోపణలు నిజమేనని కోర్టు నిర్ధారించింది. ఆ ట్విన్ టవర్స్ ను కూల్చివేయాలని ఆదేశించింది. ఈ కూల్చివేతతో 25వేల క్యూబిక్ మీటర్ల శిథిలాలు మిగులుతాయి. వాటిని తొలగించేందుకే మూడు నెలల సమయం పడుతుందని అంటున్నారు.
