వేసవి తాపం నుంచి రిలీఫ్ అయ్యే వార్త చెప్పింది వాతావరణ శాఖ. తెలంగాణ, హైదరాబాద్లకు భారత వాతావరణ శాఖ ఎల్లో అలెర్ట్ జారీ చేసింది. జూన్ 22, 23న రాష్ట్రంలోని చాలా ప్రాంతాలతో పాటు హైదరాబాద్లో ఉరుములు, మెరుపులతో కూడిన భారీ వర్షాలు పడే అవకాశం ఉంది. సిటీలో హైదరాబాద్, చార్మినార్, ఖైరతాబాద్, శేరిలింగంపల్లి, కూకట్పల్లి, ఎల్బీ నగర్, సికింద్రాబాద్ నియోజకవర్గాల్లో ఆకాశం మేఘావృతమై ఉంటుందని అధికారులు చెప్పారు. జూన్ 24, 25న తక్కువ నుంచి మధ్యస్థ స్థాయిలో వర్షాలు పడే ఛాన్స్ ఉంది.
ఆ సమయంలో 36 నుంచి 40 డిగ్రీల సెల్సియస్ ఉష్ణోగ్రతలు నమోదవుతాయని వెల్లడించింది. జూన్ 21న నిర్మల్ జిల్లాలో అత్యధికంగా 43.2 డిగ్రీలు, హైదరాబాద్లో 40.3 డిగ్రీల ఉష్ణోగ్రత నమోదైంది. వేసవి ఉక్కపోతతో అల్లాడుతున్న రాష్ట్ర ప్రజలకి నిజంగా ఇది చల్లని కబురే. నైరుతి రుతుపవనాలు ఆలస్యంగా రావడంతో అనుకున్న మేర వర్షాలు కురవకపోవచ్చని వాతావరణ శాఖ అంచనా వేసింది.
