ఇబ్రహీంపట్నం, వెలుగు: పారిశుధ్య కార్యక్రమాలు పకడ్బందీగా నిర్వహించాలని జీహెచ్ఎంసీ కమిషనర్ ఆర్.వి.కర్ణన్ ఆదేశించారు. శంషాబాద్ జోన్ పరిధిలోని ఆదిబట్లలో డిసెంబర్ 29 నుంచి 31 వరకు ప్రత్యేక పారిశుధ్య కార్యక్రమం నిర్వహించారు. మూడో రోజు బుధవారం ఆదిబట్ల, కొంగర కలాన్, బొంగ్లూర్ ప్రాంతాల్లో పారిశుధ్య కార్యక్రమాలను కర్ణన్ పరిశీలించారు.
ఈ సందర్భంగా మాట్లాడుతూ.. గ్రేటర్ హైదరాబాద్ను క్లీన్ సిటీగా తీర్చిదిద్దాలన్నారు. రానున్న రోజుల్లో చెరువులు, నాలాలు, ఫుట్పాత్లు, పార్కుల క్లీనింగ్, సీ అండ్ డీ వ్యర్థాల తొలగింపుపై దృష్టి పెట్టాలన్నారు. ఈ కార్యక్రమంలో జీహెచ్ఎంసీ శంషాబాద్ జోనల్ కమిషనర్ చంద్రకళ, ఆదిభట్ల సర్కిల్ డిప్యూటీ కమిషనర్ బి.సత్యనారాయణరెడ్డి, డీఈఈ స్వర్ణ కుమార్, ఏఈఈ యోగేశ్రెడ్డి, శానిటరీ ఇన్స్పెక్టర్లు భాస్కర్, వనిత తదితరులు పాల్గొన్నారు.
