అశ్వారావుపేట, వెలుగు: ‘తోటి పిల్లల బ్యాగుల్లో బిస్కెట్లు నువ్వే తింటున్నావ్. అందరి బుక్స్ చింపుతున్నావ్’ అని ఓ ఎస్ఎస్సీ స్టూడెంట్ను పదే పదే స్కూల్ సిబ్బంది అనుమానిస్తుండడంతో మనస్తాపానికి గురైన ఆమె హాస్టల్ విడిచి పారిపోయింది. 4 కిలోమీటర్లు నడుకుంటూ వెళ్లి తెల్లారిన తర్వాత ఎవరైనా చూస్తారేమోనని ఓ పొలంలో దాక్కుంది. ఓ రైతు ఫోన్ తీసుకుని తల్లిదండ్రులకు సమాచారమిచ్చింది. ఖమ్మం జిల్లా కొణిజర్ల మండలం రామనర్సయ్య నగర్ కు చెందిన ఓ బాలిక అశ్వారావుపేటలోని మహాత్మ జ్యోతిరావు పూలే రెసిడెన్షియల్ గురుకుల స్కూల్లో పదో తరగతి చదువుతోంది. తోటి పిల్లల పుస్తకాలు చింపుతున్నావని, ఇతర విద్యార్థుల బ్యాగుల్లో బిస్కెట్లు దొంగతనం చేసి తింటున్నావని స్కూల్ సిబ్బంది ఆమెను మాటలంటున్నారు. ఎప్పుడూ ఇలాగే సతాయిస్తుండడంతో విసుగు చెందింది. ఎట్టి పరిస్థితుల్లో స్కూల్లో ఉండొద్దని నిర్ణయించుకుని మంగళవారం తెల్లవారుజామున అందరూ గాఢనిద్రలో ఉండగా హాస్టల్ కిటికీ నుంచి దూకి పారిపోయింది. ఉదయం అటెండెన్స్ వేస్తుండగా బాలిక కనిపించకపోవటంతో పేరెంట్స్కు సమాచారమివ్వగా, వారు పీఎస్లో కంప్లయింట్ఇచ్చారు. ఈలోగా ఆమె నడుచుకుంటూ అశ్వారావుపేట మండలం గుర్రాల చెరువు వద్ద పంట పొలాల దగ్గరకు వెళ్లింది. తెల్లారడంతో ఎవరైనా చూస్తారేమోనని, మళ్లీ స్కూల్కు తీసుకువెళ్తారని పొలాల్లో దాక్కొంది. అటుగా వచ్చిన ఓ రైతు ఫోన్ తీసుకొని తల్లిదండ్రులకు కాల్చేసి చెప్పింది. దీంతో పేరెంట్స్ ఇందు దగ్గరకు వెళ్లి ఆమెను తీసుకొని స్కూల్కు వెళ్లారు. తమ కూతురిపై లేనిపోని ఆరోపణలు చేసి మానసికంగా వేధించారని ఆందోళన చేశారు. దీంతో ఎస్ఐ అరుణ ఏదైనా సమస్య ఉంటే కంప్లయింట్ ఇవ్వాలని కోరారు. తర్వాత సిబ్బంది పై చర్యలు తీసుకోవాలని పేరెంట్స్ పోలీసులకు ఫిర్యాదు చేశారు.
