ఐబొమ్మ రవికి సినీ ఇండస్ట్రీతో సంబంధాలు!

•  రెండో దఫా విచారణలో వివరాలు సేకరించిన పోలీసులు
• క్వాలిటీ మెరుగుపరిచేందుకు టెక్నీషియన్లతో రవి ఒప్పందాలు
• నాంపల్లి కోర్టులో నిందితుడి హాజరు
• తిరిగి చంచల్​గూడ జైలుకు

బషీర్​బాగ్, వెలుగు: సైబర్ క్రైమ్ పోలీసుల కస్టడీలో ఉన్న ఐబొమ్మ వెబ్‌‌సైట్ నిర్వాహకుడు ఇమ్మడి రవి విచారణలో కీలక అంశాలు వెలుగులోకి వస్తున్నాయి. రెండో దఫా కస్టడీలో రవిని విచారించిన పోలీసులు.. ఆయన మెయిల్ అకౌంట్లను రిట్రీవ్ చేసి కీలకమైన డిజిటల్ ఆధారాలు సేకరించారు. 

ఐబొమ్మ, బప్పం వంటి పైరసీ వెబ్‌‌సైట్లలో రవి 21 వేలకుపైగా సినిమాలు అప్‌‌లోడ్ చేసినట్లు గుర్తించారు. థియేటర్లలో, ఓటీటీలో విడుదలైన సినిమాలను కూడా రవి తన నెట్‌‌వర్క్ ద్వారా రికార్డు చేయించినట్లు సమాచారం. రికార్డు చేసిన సినిమాల ఆడియో, వీడియో క్వాలిటీ మెరుగుపర్చేందుకు కరేబియన్ దీవుల్లో ఉన్న ఔట్‌‌సోర్సింగ్ టెక్నీషియన్లతో ప్రత్యేక ఒప్పందాలు చేసుకున్నట్లు రవి వెల్లడించారు. 

పైరసీకి ఉపయోగించే అడ్వాన్స్‌‌డ్ టెక్నాలజీ, టూల్స్, సాఫ్ట్‌‌వేర్‌‌ గురించి, తాను నిర్వహించిన వెబ్‌‌సైట్ల పేర్ల గురించి కూడా పోలీసులకు రవి పూర్తి క్లారిటీ ఇచ్చారు. ‘‘విశాఖలో సినిమాను బొమ్మ అని పిలుస్తారు. ఇంటర్ నెట్‌‌లో బొమ్మలను చూపిస్తున్నందుకే ‘ఐబొమ్మ’అని పేరు పెట్టాం. మరో వెబ్‌‌సైట్‌‌కు బలపం అనే పేరు పెట్టాలని భావించినా, డొమైన్ లో టెక్నికల్ సమస్యల కారణంగా ‘ఎల్’అక్షరం తీసి ‘బప్పం’గా మార్చాం’’అని రవి విచారణలో తెలిపాడు. 

ఈ మొత్తం వివరాలను పోలీసులు నాంపల్లి కోర్టుకు సమర్పించనున్నారు. అలాగే రవి ఆర్థిక లావాదేవీలు, నెట్‌‌వర్క్ వివరాలు, కమ్యూనికేషన్ డేటాను కూడా పోలీసులు పరిశీలించారు. సినీ పరిశ్రమకు చెందిన పలువురితో రవికి సంబంధాలు ఉన్నట్లు అనుమానిస్తున్నారు. 

ఈ కోణంలో కూడా వివరాలు సేకరించినట్టు తెలిసింది. రెండోసారి విచారణ పూర్తయిన తర్వాత పోలీసులు స్పష్టత ఇవ్వనున్నారు. ఈ కేసుకు సంబంధించి సోషల్ మీడియాలో రకరకాల వార్తలు వైరల్ అవుతుండడంతో, అధికారిక సమాచారాన్ని వెల్లడిస్తూ అపోహలను తొలగించే ప్రయత్నంలో పోలీసులు ఉన్నారు. ఇక విచారణ పూర్తయ్యాక రవిని సైబర్ క్రైమ్ పోలీసులు శనివారం నాంపల్లి కోర్టులో హాజరుపరిచి తిరిగి చంచల్ గూడ జైలుకు తరలించారు.