- భారీగా ఎగిసిపడిన మంటలు
- ఇద్దరికి గాయాలు
జీడిమెట్ల, వెలుగు : అండర్ గ్రౌండ్లో ఉన్న గ్యాస్ పైప్లైన్కు లీకేజీ ఏర్పడటంతో భారీగా మంటలు ఎగిసిపడ్డాయి. ఈ ఘటన జీడిమెట్ల డివిజన్ సుచిత్ర చౌరస్తా సమీపంలోని నేషనల్ హైవేపై సోమవారం జరిగింది. కొంత కాలంగా సుచిత్ర చౌరస్తాలో హైవే విస్తరణ పనులు జరుగుతున్నాయి. ఈ క్రమంలో అండర్ గ్రౌండ్లో ఉన్న భాగ్యనగర్ గ్యాస్ పైప్లైన్కు లీకేజీ ఏర్పడింది. దీంతో ఒక్కసారిగా మంటలు ఎగిసిపడ్డాయి.
స్థానికులు వెంటనే జీడిమెట్ల ఫైర్స్టేషన్ సిబ్బందికి ఫోన్ చేశారు. వాళ్లు వచ్చి మంటలు ఆర్పే ప్రయత్నం చేశారు. ఈ ఘటనలో రాజు (27), సాయినాథ్ (48) గాయపడ్డారు. వాళ్లను ట్రీట్మెంట్ కోసం ఓ హాస్పిటల్కు తరలించారు. అయితే, పైప్లైన్ లీకేజీకి కారణాలు తెలియరాలేదు. రోడ్డు విస్తరణ పనులు చేస్తున్నప్పుడే పైప్లైన్కు ప్రొక్లెనర్ తగలడంతో గ్యాస్ లీకైందని స్థానికులు చెబుతున్నారు. అదే సమయంలో మంటలు చెలరేగి ఉంటాయని అంటున్నారు. గ్యాస్ లీక్ టైమ్లో అటుగా వెళ్తున్న కొందరు సిగరెట్ తాగి పడేయడంతోనే మంటలు వ్యాపించాయని మరికొందరు చెబుతున్నారు.
