- గత ఐదు క్వార్టర్లలో ఇదే అత్యధికం
న్యూఢిల్లీ: భారతదేశ స్థూల జాతీయోత్పత్తి (జీడీపీ) ప్రస్తుత ఆర్థిక సంవత్సరం ఏప్రిల్–-జూన్ కాలంలో 7.8 శాతంగా నమోదైంది. గత ఐదు క్వార్టర్లలో ఇదే అత్యధిక వృద్ధి. వ్యవసాయ రంగం మెరుగైన పనితీరు, వాణిజ్యం, హోటల్, ఆర్థికం, రియల్ ఎస్టేట్లాంటి సేవల రంగాల ఎదుగుదల వల్ల ఆర్థిక వృద్ధి పుంజుకుందని ప్రభుత్వ డేటా వెల్లడించింది. అయితే టారిఫ్ల వల్ల టెక్స్టైల్స్, రొయ్యల వంటి ఎగుమతులపై ప్రభావం పడొచ్చని నేషనల్ స్టాటిస్టిక్స్ ఆఫీస్(ఎన్ఎస్ఓ) రిపోర్ట్ తెలిపింది. దీని ప్రకారం 2024–-25 ఆర్థిక సంవత్సరం ఏప్రిల్–-జూన్ కాలంలో 1.5 శాతంగా ఉన్న వ్యవసాయ రంగం వృద్ధి ఈ ఆర్థిక సంవత్సరంలో 3.7 శాతానికి పెరిగింది.
తయారీ రంగం వృద్ధి స్వల్పంగా పెరిగి 7.7 శాతంగా నమోదైంది. గత ఆర్థిక సంవత్సరం మొదటి క్వార్టర్లో ఇది 7.6 శాతం ఉంది. మనదేశం ప్రపంచంలోనే అత్యంత వేగంగా అభివృద్ధి చెందుతున్న ప్రధాన ఆర్థిక వ్యవస్థగా నిలిచింది. ఏప్రిల్–-జూన్ కాలంలో చైనా జీడీపీ వృద్ధి 5.2 శాతంగా ఉంది. ఈ నెలలో ఆర్బీఐ 2025–-26 ఆర్థిక సంవత్సరానికి వాస్తవ జీడీపీ వృద్ధి రేటు 6.5 శాతంగా ఉంటుందని అంచనా వేసింది. మొదటి క్వార్టర్లో 6.5 శాతం, రెండో క్వార్టర్లో 6.7 శాతం, మూడో క్వార్టర్లో 6.6 శాతం, నాలుగో క్వార్టర్లో 6.3 శాతం ఉండొచ్చని పేర్కొంది.
సత్తా చాటిన సేవల రంగం
ఈసారి సేవల రంగం వృద్ధి రేటు 9.3 శాతంగా నమోదైంది. గతేడాది ఇదే కాలంలో ఇది 6.8 శాతంగా ఉంది. సేవల రంగంలో వాణిజ్యం, హోటల్, రవాణా, ఆర్థిక సంస్థలు, రియల్ ఎస్టేట్, వృత్తిపరమైన సేవలు, ప్రభుత్వ పరిపాలన, రక్షణ ఉన్నాయి. ఖనిజాలు, తవ్వకాల రంగం వృద్ధి -3.1 శాతం, విద్యుత్, గ్యాస్, నీటి సరఫరా, ఇతర సేవల రంగం వృద్ధి 0.5 శాతం తగ్గింది. ఈ విషయమై ఐసీఆర్ఏ ప్రధాన ఆర్థికవేత్త అదితి నాయర్ మాట్లాడుతూ, రాబోయే త్రైమాసికాల్లో ద్రవ్యోల్బణం, యూఎస్ టారిఫ్, జరిమానాల ప్రభావం వల్ల ఎగుమతులు మందగించవచ్చని తెలిపారు.
29 శాతానికి చేరిన ద్రవ్యలోటు
ఈ ఏడాది జులై చివరి నాటికి కేంద్ర ప్రభుత్వ ఆర్థిక లోటు మొత్తం ఆర్థిక సంవత్సర లక్ష్యంలో 29.9 శాతానికి పెరిగింది. అంతకు ముందు ఆర్థిక సంవత్సరం ఇదే కాలంలో ఇది బడ్జెట్ అంచనాల్లో 17.2 శాతంగా ఉందని కంట్రోలర్జనరల్ ఆఫ్ అకౌంట్స్(సీజీఏ) వెల్లడించింది. ప్రస్తుత ఆర్థిక సంవత్సరం మొదటి క్వార్టర్ (ఏప్రిల్-జూన్) ముగిసే సమయానికి ఆర్థిక లోటు పూర్తి సంవత్సర లక్ష్యంలో 17.9 శాతంగా నమోదైంది. ఈసారి ఏప్రిల్-జులై కాలంలో ఆర్థిక లోటు రూ. 4,68,416 కోట్లుగా ఉంది. 2025-26 ఆర్థిక సంవత్సరానికి ఆర్థిక లోటు జీడీపీలో 4.4 శాతం లేదా రూ. 15.69 లక్షల కోట్లుగా ఉంటుందని కేంద్రం అంచనా వేసింది.
