ఆస్ట్రేలియాతో జరిగిన మూడో టీ20లో టీమిండియా ఘన విజయం సాధించింది. ఆదివారం (నవంబర్ 2) హోబర్ట్ వేదికగా బెల్లెరివ్ ఓవల్ లో జరిగిన హాయ్ స్కోరింగ్ మ్యాచ్ లో టీమిండియా 5 వికెట్ల తేడాతో విజయం సాధించి ఆతిధ్య ఆస్ట్రేలియాకు షాక్ ఇచ్చింది. భారీ ఛేజింగ్ లో వాషింగ్ టన్ సుందర్ (23 బంతుల్లో 49: 3 ఫోర్లు, 4 సిక్సర్లు) అద్భుత క్యామియోతో పాటు మిగిలిన టీమిండియా బ్యాటర్లు తలో చేయి వేసి జట్టుకు విజయాన్ని అందించారు. మొదట బ్యాటింగ్ చేసిన ఆస్ట్రేలియా నిర్ణీత 20 ఓవర్లలో 6 వికెట్ల నష్టానికి 188 పరుగులు చేసింది. ఆ తర్వాత ఛేజింగ్ లో ఇండియా 18.3 ఓవర్లలో 5 వికెట్లు కోల్పోయి 188 పరుగులు చేసి గెలిచింది.
భారీ లక్ష్య ఛేదనలో ఇండియాకు ఎప్పటిలాగే ఓపెనర్ అభిషేక్ శర్మ ,మెరుపు ఆరంభాన్ని ఇచ్చాడు. ఫోర్లు, సిక్సర్లతో పవర్ ప్లే లో జట్టు స్కోర్ ను ముందుకు తీసుకెళ్లాడు. మంచి టచ్ లో కనిపించిన అభిషేక్ ను ఎల్లిస్ స్లో బాల్ తో ఔట్ చేశాడు. ఈ సిరీస్ లో చెత్త ఫామ్ లో ఉన్న శుభమాన్ గిల్ 15 పరుగులే చేసి నిరాశపరిచాడు. సూర్య ఉన్నంత సేపు మెరుపులు మెరిపించినా వెంటనే ఔటయ్యాడు. ఐదో స్థానంలో అక్షర్ పటేల్ తక్కువ స్కోర్ కే ఔటై నిరాశపరిచాడు. దీంతో ఇండియా విజయం అసాధ్యమనే భావన కలిగింది. అయితే ఇక్కడ నుంచే అసలైన ఆట మొదలయింది.
ఆరో స్థానంలో బ్యాటింగ్ కు వచ్చిన సుందర్ మ్యాచ్ స్వరూపాన్నే మార్చేశాడు. తిలక్ వర్మ సహాయంతో జట్టును ముందుకు తీసుకెళ్లాడు.మరో ఎండ్ లో తిలక్ కూడా బ్యాట్ ఝులిపించడంతో ఇండియా వేగంగా పరుగులు రాబట్టింది. ముఖ్యంగా సుందర్ సిక్సర్లతో విరుచుకుపడడం హైలెట్ గా మారింది. తిలక్ వర్మ ఔటైనా జితేష్ చివర్లో మెరుపు ఇన్నింగ్స్ ఆడడంతో ఇండియా మరో 9 బంతులు మిగిలి ఉండగానే విజయం సాధించింది. ఆస్ట్రేలియా బౌలర్లలో ఎల్లిస్ మూడు.. మార్కస్ స్టోయినిస్, బార్ట్ లెట్ తలో వికెట్ తీసుకున్నారు.
రెచ్చిపోయిన డేవిడ్, స్టోయినిస్:
టాస్ ఓడి మొదట బ్యాటింగ్ కు దిగిన ఆస్ట్రేలియా నిర్ణీత 20 ఓవర్లలో 6 వికెట్ల నష్టానికి 188 పరుగులు చేసింది. డేవిడ్ 74 పరుగులతో టాప్ స్కోరర్ గా నిలిచాడు. అర్ష్దీప్ సింగ్ మూడు.. వరుణ్ చక్రవర్తి రెండు.. శివమ్ దూబే ఒక వికెట్ పడగొట్టారు. ఆసీస్ ఇన్నింగ్స్ విషయానికి వస్తే తొలి ఓవర్ లోనే ప్రమాదకర ట్రావిస్ హెడ్ (6)ను అర్షదీప్ సింగ్ ఔట్ చేశాడు. మూడో ఓవర్ లో జోష్ ఇంగ్లిస్ (1) ను పెవిలియన్ కు పంపి కంగారులకు డబుల్ షాక్ ఇచ్చాడు. 14 పరుగులకే రెండు వికెట్లు కోల్పోయా ఆస్ట్రేలియా జట్టును కెప్టెన్ మిచెల్ మార్ష్ తో పాటు టిమ్ డేవిడ్ ఆదుకున్నారు.
పవర్ ప్లే లో వేగంగా ఆడుతూ పరుగుల వరద పారించారు. ఒక ఎండ్ లో మార్ష్ తడబడుతున్నా మరో ఎండ్ లో డేవిడ్ రెచ్చిపోయి ఆడాడు. మూడో వికెట్ కు 59 పరుగులు జోడించిన తర్వాత 11 పరుగుల వ్యక్తిగత స్కోర్ వద్ద మార్ష్ ఔటయ్యాడు. ఐదో స్థానంలో బ్యాటింగ్ కు వచ్చిన మిచెల్ ఒవేన్ ని వరుణ్ చక్రవర్తి తొలి బంతికే పెవిలియన్ కు పంపాడు. దేంతో ఆస్ట్రేలియా 73 పరుగులకే నాలుగు వికెట్లు కోల్పోయి కష్టాల్లో పడినట్టుగా కనిపించింది. అయితే టిమ్ డేవిడ్, మార్కస్ స్టోయినిస్ ఆకాశమే హద్దుగా చెలరేగారు.
భారత బౌలర్లపై ఆధిపత్యం చూపిస్తూ స్కోర్ కార్డును పరుగులు పెట్టించారు. ఈ క్రమంలో 23 బంతుల్లోనే హాఫ్ సెంచరీ చేసిన డేవిడ్ 74 పరుగుల వద్ద ఔటవ్వడంతో ఇండియాకు బిగ్ రిలీఫ్ లభించింది. డేవిడ్ ఔటైన తర్వాత స్టోయినిస్ షో మొదలయింది. చివరి వరకు క్రీజ్ లో ఉండి జట్టుకు భారీ స్కోర్ అందించాడు.
Washington Sundar headlines a combined batting effort as India equalise in Hobart 👊
— ESPNcricinfo (@ESPNcricinfo) November 2, 2025
LIVE: https://t.co/hwQU7AUDcy pic.twitter.com/Ax62lbXSy3
