న్యూఢిల్లీ: పారిశ్రామిక ఉత్పత్తి వృద్ధి రేటు (ఐఐపీ) మార్చి నెలలో ఐదు నెలల కనిష్ట స్థాయికి పడిపోయింది. తయారీ రంగం మందగించడం, విద్యుత్ ఉత్పత్తిలో పెద్దగా మార్పు లేకపోవడం వల్ల ఐఐపీ వృద్ధి 4.1 శాతానికి పరిమితమైంది. గతేడాది ఇదే నెలలో వృద్ధి 3.9 శాతంగా ఉంది. గనుల తవ్వకం రంగం 5.5 శాతం వృద్ధిని నమోదు చేయగా, విద్యుత్ రంగం 0.8 శాతం మాత్రమే పుంజుకుంది. పారిశ్రామిక విభాగంలోని 23 పరిశ్రమల్లో 14 రంగాలు సానుకూల వృద్ధిని కనబరిచాయి.
ముఖ్యంగా లోహాల తయారీ, మోటార్ వాహనాలు, యంత్ర పరికరాల రంగాలు మంచి పనితీరు కనబరిచాయని జాతీయ గణాంక కార్యాలయం (ఎన్ఎస్ఓ) వెల్లడించింది. అంతర్జాతీయంగా నెలకొన్న ఉద్రిక్తతల ప్రభావం పరిశ్రమల వృద్ధిపై కనిపిస్తోంది. వినియోగదారుల అవసరాలకు సంబంధించిన వస్తువుల ఉత్పత్తి కూడా సాధారణ స్థాయిలోనే ఉంది. 2025 నుంచి 2026 ఆర్థిక సంవత్సరంలో పారిశ్రామిక వృద్ధి 4.1 శాతంగా నమోదైంది. ఉత్పాదక రంగంలో వృద్ధి రేటు ఆశించిన స్థాయిలో లేకపోవడం ఆందోళన కలిగిస్తోంది.
