హైదరాబాద్, వెలుగు: రాష్ట్రంలో ఇంటర్ అడ్వాన్స్డ్ సప్లిమెంటరీ ఫలితాలు విడుదలయ్యాయి. ఫస్టియర్ లో 63.86%, సెకండియర్లో 43.77% మంది పాసయ్యారు. సోమవారం సెక్రటేరియెట్లో విద్యాశాఖ ముఖ్యకార్యదర్శి బుర్ర వెంకటేశం ఫలితాలను రిలీజ్ చేశారు. రాష్ట్రవ్యాప్తంగా మే 24 నుంచి జూన్ 3 వరకు పరీక్షలు జరిగాయి.
ఫస్టియర్లో 2,54,498 మంది పరీక్షలకు అటెండ్ కాగా, వారిలో 1,62,520 మంది పాసయ్యారు. దీంట్లో ఇంప్రూవ్ మెంట్ రాసిన వాళ్లు 1,06,484 మంది ఉండగా, నాన్ ఇంప్రూవ్ మెంట్ విద్యార్థులు 56,036 మంది ఉన్నారు. ఒకేషనల్లో 18,913 మంది పరీక్ష రాయగా, 10,070 మంది ఉత్తీర్ణత సాధించారు. సెకండియర్లో 1,38,477 మంది స్టూడెంట్లు ఎగ్జామ్స్ రాయగా, 60,615 మంది పాసయ్యారు.
ఒకేషనల్లో 15,136 మంది పరీక్షలు రాయగా 7,737 మంది పాసయ్యారు. ఫస్టియర్ పాస్ పర్సంటేజీలో ములుగు జిల్లా 85.29%తో టాప్లో ఉండగా, కామారెడ్డి జిల్లా 44.38%తో చివరి స్థానంలో ఉంది. సెకండియర్లోనూ ములుగు జిల్లా 81.47శాతంతో మొదటి స్థానంలో ఉండగా, వికారాబాద్ జిల్లా 29.59 శాతంతో చివరి స్థానంలో నిలిచింది. ఫలితాలను https://tgbie.cgg.gov.in లేదా https://results.cgg.gov.inలో చూడొచ్చని అధికారులు ప్రకటించారు. విద్యార్థులు వెబ్ సైట్ నుంచి మెమో డౌన్ లోడ్ చేసుకోవచ్చని వెల్లడించారు. ఈ నెల 25 నుంచి 29 వరకు విద్యార్థులు రీకౌంటింగ్, రీవెరిఫికేషన్ కోసం దరఖాస్తు చేసుకోవచ్చని సూచించారు.
