చౌటుప్పల్, వెలుగు : యాదాద్రి జిల్లాలోని దివిస్ ఫార్మా కంపెనీలో ఐటీ అధికారులు దాడులు నిర్వహిస్తున్నారు. మంగళవారం ఉదయం నుంచి రాత్రి వరకు సోదాలు జరిగాయి. చౌటుప్పల్మండలం అంకిరెడ్డిగూడెంలో ఉన్న దివిస్ఫార్మా కంపెనీకి ఉదయం 11 గంటలకు వచ్చిన అధికారులు.. లోనికి వెళ్లి కంపెనీ గేట్లను మూసి వేయించారు. ఆ తర్వాత కొద్దిసేపటికే కంపెనీలోని పెద్ద ఉద్యోగుల సెల్ఫోన్లు మూగబోయాయి. కంపెనీలోకి స్థానిక పోలీసులతో సహా ఇతరులెవరిని అనుమతించడం లేదు. ఐటీ దాడుల విషయం స్థానిక పోలీసులను అడిగినా.. తమకేం తెలియదని చెబుతున్నారు. దీంతో అసలు కంపెనీలో ఏం జరుగుతుందో తెలియని సందిగ్ధ పరిస్థితి నెలకొంది.
5 రోజుల క్రితమే ఇద్దరు మంత్రులు
అక్టోబర్ 27న మంత్రులు శ్రీనివాస్ గౌడ్, మల్లారెడ్డి దివిస్ కంపెనీకి వెళ్లారు. యాజమాన్యంతో కాలుష్యం, స్థానికులకు ఉద్యోగాలు ఇచ్చే అంశంపై చర్చించినట్టు చెప్పారు. నవంబర్నుంచి స్థానికులకు ఉద్యోగాలు ఇస్తామని యాజమాన్యం హామీ ఇచ్చినట్టు తెలిపారు. అయితే మంత్రులు వచ్చివెళ్లిన ఐదో రోజే కంపెనీలో ఐటీ అధికారులు సోదాలు చేపట్టారు. దీంతో ఎన్నికలకు సంబంధించి డబ్బు వ్యవహారం కారణంగా ఐటీ దాడులు జరిగాయా..? అన్న అనుమానాలు తలెత్తుతున్నాయి.
