- మేనేజ్మెంట్లతో డే కేర్ సెంటర్లు టై అప్
- కొన్నిచోట్ల ఫ్రీగా, మరికొన్ని కంపెనీల్లో తక్కువ చార్జీలతో సేవలు
హైదరాబాద్, వెలుగు: గ్రేటర్ సిటీలో భార్యాభర్తలిద్దరూ జాబ్ చేస్తే పిల్లలను చూసుకునే వీలులేని పరిస్థితి. దీంతో వారు డే కేర్ సెంటర్లలో, ప్లే స్కూళ్లలో పిల్లలను చేర్పిస్తుంటారు. కానీ వారు అక్కడ ఎలా ఉన్నారో అనే బెంగ మాత్రం పేరెంట్స్ను వెంటాడుతూనే ఉంటుంది. తల్లిదండ్రులు పడే ఇలాంటి వేదనకు కొన్ని సంస్థలు పుల్స్టాప్ పెట్టే ప్రయత్నం చేస్తున్నాయి. కంపెనీల్లోనే డే కేర్సెంటర్లను ఏర్పాటు చేస్తున్నాయి. దీంతో పిల్లలను తల్లిదండ్రులు నేరుగా ఆఫీసులకే తీసుకొని వెళ్తున్నారు. అక్కడి డే కేర్ సెంటర్లలో వదిలి పనిచేసుకుంటున్నారు. సిటీలోని పలు కంపెనీలు ఇలాంటి సేవలు అందిస్తున్నాయి. కొన్ని చోట్ల ఉచితంగా, మరికొన్ని చోట్ల తక్కువ చార్జీలతో ఈ ఫెసిలిటీని అందిస్తున్నాయి.
ఒకేచోట ఉండేలా..
ఐదేండ్లుగా సిటీలోని పలు కంపెనీల్లో డే కేర్ సెంటర్ల సౌకర్యం ఉన్నప్పటికీ లాక్డౌన్తో అంతా మారిపోయింది. అయితే మళ్లీ మాములు స్థితికి రావడంతో తిరిగి కంపెనీలు తమ ఉద్యోగులకు ఈ సౌకర్యాన్ని కల్పిస్తున్నాయి. కంపెనీకి సంబంధించిన బిల్డింగ్లోనే ఈ డే కేర్ సెంటర్ను ఏర్పాటు చేస్తున్నారు. పిల్లలను మరో చోట ఉంచి వారికి దూరంగా ఉంటున్నామనే బాధ నుంచి తల్లిదండ్రులను ఉపశమనం కలిగిస్తున్నాయి. పిల్లలను నేరుగా ఆఫీసుకే తీసుకువస్తున్నారు. వర్క్ చేసుకుంటూనే నచ్చిన సమయంలో డే కేర్సెంటర్కు వెళ్లి పిల్లలను చూసుకుంటున్నారు. ఫలితంగా ఎలాంటి ఆందోళన లేకుండా పనిచేసుకుంటున్నామని ఆనందం వ్యక్తం చేస్తున్నారు.
తక్కువ చార్జీలతో..
సిటీలోని పలు కంపెనీలు తమ ఉద్యోగులకు ఈ సౌకర్యాన్ని ఉచితంగా అందిస్తున్నాయి. కంపెనీ మేనేజర్ నుంచి పర్మిషన్ తీసుకుని పిల్లలను సెంటర్లో చేర్పించాల్సి ఉంటుంది. సిటీలోని చాలా కంపెనీలతో ప్రీ స్కూల్స్, డే కేర్ సెంటర్ కంపెనీ టై అప్ అయ్యి ఆఫీస్ల్లో ఈ ఫెసిలిటీ అందిస్తోంది. కొన్ని చోట్ల బయటతో పోలిస్తే తక్కువగా చార్జ్ చేస్తూ పిల్లల ఆలనాపాలనా చూసుకుంటోంది. అవర్లీ బేసిస్లో కూగా ఉపయోగించుకునే సౌకర్యం కల్పిస్తోంది. అన్ని కంపెనీల్లో ఇలాంటి సౌకర్యం అందుబాటులోకి వస్తే బాగుంటుందని ఉద్యోగులు, ముఖ్యంగా తల్లిదండ్రులు కోరుతున్నారు.
నాతో పాటే తీసుకెళ్తున్నా
మా పాపను నాతో పాటే ఆఫీసుకు తీసుకెళ్తున్నా. అక్కడి డే కేర్ సెంటర్లో ఉంచి.. బ్రేక్ టైమ్లో వెళ్లి చూస్తా. సెంటర్లలో ఎలాంటి ఇబ్బంది లేకుండా బాగా చూసు కుంటారు. కొన్ని కంపెనీల్లో చాలా కాలం నుంచే ఈ సౌకర్యం అందుబాటులో ఉంది. - అక్షర, ఐటీ ఎంప్లాయ్, ఉప్పల్
చాలా కంపెనీల్లో..
ఈ తరహా సేవలు గతంలో బెంగుళూరులో ఎక్కువగా ఉండేవి. ఇప్పుడు సిటీలోనూ ఈ ఫెసిలిటీ అందుబాటులోకి వచ్చింది. చాలా కంపెనీల్లో ఈ అవకాశాన్ని కల్పిస్తున్నారు. కార్పొరేట్ కంపెనీలతో ఓ డే కేర్ సంస్థ టై అప్ అయ్యి సేవలందిస్తోంది.
- శ్రీధర్ మెరుగు, ఫౌండర్, ఐటీ అండ్ ఎంటర్ ప్రెన్యూర్ ఫోరం