న్యూఢిల్లీ: ఉమెన్స్ ప్రీమియర్ లీగ్ (WPL )లో టీమిండియా మహిళా స్టార్ క్రికెటర్, ఢిల్లీ కెప్టెన్ జెమీమా రోడ్రిగ్స్ అరుదైన ఘనత సాధించింది. డబ్ల్యూపీఎల్లో అతి పిన్న వయస్కురాలైన (25 సంవత్సరాల 127 రోజులు) కెప్టెన్గా రికార్డ్ సృష్టించింది. ఇప్పటి వరకు ఈ రికార్డ్ స్టార్ ప్లేయర్ స్మృతి మందనా పేరిట ఉండేది.
26 సంవత్సరాల 230 రోజుల వయసులో రాయల్ ఛాలెంజర్స్ బెంగళూరు (RCB)కి స్మృతి నాయకత్వం వహించింది. డబ్ల్యూపీఎల్ సీజన్ 4లో ఢిల్లీ కెప్టెన్గా ఎంపిక అవ్వడం ద్వారా స్మృతి రికార్డ్ను జెమీమా అధిగమించింది. కాగా, డబ్ల్యూపీఎల్ సీజన్ 4లో భాగంగా శనివారం (జనవరి 10) నవీ ముంబైలోని డీవై పాటిల్ స్టేడియం వేదికగా ముంబై, ఢిల్లీ తలపడ్డాయి. ఈ మ్యాచులో టాస్ గెలిచిన డీసీ కెప్టెన్ జెమీమా తొలుత బౌలింగ్ ఎంచుకుంది.
జెమీమాకు ప్రమోషన్:
2025 వన్డే వరల్డ్ కప్ సెమీస్లో ఆస్ట్రేలియాపై అజేయ శతకంతో టీమిండియాకు చిరస్మరణీయ విజయాన్ని అందించిన భారత మహిళా స్టార్ క్రికెటర్ జెమీమా రోడ్రిగ్స్కు ఉమెన్స్ ప్రీమియర్ లీగ్ (డబ్ల్యూపీఎల్)లో ప్రమోషన్ దక్కింది. ఢిల్లీ క్యాపిటల్స్ కెప్టెన్గా జెమీమా బాధ్యతలు చేపట్టింది. ఈ సీజన్లో ఇండియన్ ప్లేయర్ను కెప్టెన్గా నియమించాలని ఢిల్లీ మేనేజ్మెంట్ భావించింది. ఇందులో భాగంగానే మెగ్ లానింగ్ స్థానంలో జెమీమాకు డీసీ నాయకత్వ పగ్గాలు దక్కాయి.
