హైదరాబాద్, వెలుగు: సీఎం కేసీఆర్ అబద్ధాలకు బ్రాండ్ అంబాసిడర్ అని, ప్రజల్ని నిట్టనిలువునా మోసం చేయడంలో దిట్ట అని పీసీసీ వర్కింగ్ ప్రెసిడెంట్ మహేశ్ కుమార్ గౌడ్ అన్నారు. మంగళవారం గాంధీభవన్లో పీసీసీ వైస్ ప్రెసిడెంట్ చెరుకు సుధాకర్తో కలిసి ఆయన మీడియాతో మాట్లాడారు. కేసీఆర్ ఎన్నికలకు ముందు హామీలు ఇచ్చి, ఆ తర్వాత మర్చిపోతారన్నారు. ఎనిమిదేండ్లుగా ఆయన ఇచ్చిన ఎన్నో హామీలను నెరవేర్చలేదన్నారు. దళిత సీఎం, ఇంటికో ఉద్యోగం, గిరిజన రిజర్వేషన్, నిరుద్యోగ భృతి వంటి హామీలను అమలు చేయలేదన్నారు. హుజూరాబాద్ ఉప ఎన్నిక కోసం దళిత బంధును ప్రకటించి, ఆ తర్వాత దానిని అటకెక్కించారని విమర్శించారు.
మునుగోడు ఉపఎన్నిక కోసం గొర్ల పంపిణీ అని చెప్పి, దానిని ఓ ప్రహసనంగా మార్చారన్నారు. రుణమాఫీ, ఉచిత ఎరువుల పేరుతోనూ కేసీఆర్ మోసం చేశారన్నారు. పోడు భూముల సమస్యను పరిష్కరించకుండా మరింత జటిలంగా మార్చారన్నారు. ఇపుడు బీఆర్ఎస్లోకి ఆంధ్రా నాయకులను ఆహ్వానిస్తూ కొత్త ఎత్తులు వేస్తున్నారని చెప్పారు. బీజేపీ డైరెక్షన్ మేరకే బీఆర్ఎస్ ఏర్పాటు చేసిన కేసీఆర్ తన కుటుంబ ఆస్తులు మరింత పెంచుకునే ఆలోచనతో ఉన్నారన్నారు. రానున్న ఎన్నికల్లో కేసీఆర్కు ప్రజలు తగిన రీతిలో బుద్ధి చెబుతారన్నారు. చెరుకు సుధాకర్ మాట్లాడుతూ.. కేసీఆర్ పనులన్నీ గోల్ మాల్ గోవిందం తరహాలో ఉన్నాయని విమర్శించారు. ఎన్నికలను దృష్టిలో పెట్టుకొనే అన్ని స్కీమ్లను తెస్తారన్నారు. కేంద్ర హోం మంత్రి అమిత్షా డైరెక్షన్లోనే బీఆర్ఎస్ ను నడుపుతున్న కేసీఆర్ కుట్రలను ఎండగట్టాలని ఆయన పిలుపునిచ్చారు.
