Silver Bullish: వెండి... ఈ లోహం ఎప్పుడూ బంగారానికి ఒక ప్రత్యామ్నాయంగానో, లేదా "పేదల బంగారం" గానో మాత్రమే పరిగణించబడేది. కానీ గత కొన్ని సంవత్సరాలుగా, వెండి తన అసలు శక్తిని చాటుకుంటోంది. మహమ్మారి ప్రారంభమైన తర్వాత కనిష్ట స్థాయిల నుండి వెండి ధరలు ఏకంగా 3.5 రెట్లు పెరిగి, బంగారాన్ని కూడా అధిగమించాయి. అయితే ఈ పెరుగుదల తాత్కాలికమైనది కాదంటున్నారు నిపుణులు.
పారిశ్రామిక డిమాండ్ పెరుగుదల..
ప్రస్తుత కాలంలో వెండి కీలక పాత్ర పోషిస్తోంది. కేవలం కేవలం నగలు, నాణేలకే పరిమితం కాలేదు. ఇది ఒక ముఖ్యమైన పారిశ్రామిక లోహంగా ప్రస్తుతం వినియోగంలో ఉంది. ముఖ్యంగా ఎలక్ట్రిక్ వాహనాలు, సోలార్ ప్యానెల్స్ ఉత్పత్తిలో వెండి కీలక పాత్ర పోషిస్తుంది. ప్రపంచవ్యాప్తంగా వాతావరణ మార్పులపై పెరుగుతున్న ఆందోళనలు, పునరుత్పాదక ఇంధన వనరుల పట్ల పెరుగుతున్న ఆసక్తి సోలార్ ఎనర్జీ రంగానికి భారీ ఊతం ఇస్తున్నాయి. ఈ సోలార్ ప్యానెల్స్ తయారీలో వెండి ఒక వాహకంగా ఉపయోగించటంతో పాటు.. ఈవీల్లో కూడా అనేక ఎలక్ట్రానిక్ కాంపోనెంట్లలో వెండిని విస్తృతంగా వాడతారు. ఈ రెండు రంగాలు వేగంగా విస్తరిస్తుండటంతో, వెండికి డిమాండ్ అంచనాలకు మించి పెరుగుతోంది.
సరఫరా కొరత-మైనింగ్ సవాళ్లు..
వెండి ఉత్పత్తికి కొన్ని పరిమితులు ఉన్నాయి. వెండిని ఎక్కువగా రాగి, సీసం, జింక్ తవ్వకాల సమయంలో ఉప-ఉత్పత్తిగా పొందుతుంటారు. అందువల్ల ప్రత్యేకంగా వెండి కోసం గనులను తవ్వడం తక్కువ. ప్రధాన లోహాల ఉత్పత్తిలో తగ్గుదల లేదా స్తబ్దత ఉన్నప్పుడు.. అది వెండి సరఫరాను కూడా ప్రభావితం చేస్తుంది. ప్రస్తుతం ఉన్న గనుల్లో ఉత్పత్తి ఖర్చులు పెరగడం సరఫరాపై ఒత్తిడిని పెంచుతోందని తెలుస్తోంది. పెరుగుతున్న డిమాండ్‌కు తగ్గ సరఫరా లేకపోవడం వెండి ధరల్లో ర్యాలీకి ప్రధాన కారణం అయ్యింది.
ద్రవ్యోల్బణం..
చారిత్రాత్మకంగా గోల్డ్ అండ్ సిల్వర్ ద్రవ్యోల్బణం నుంచి రక్షణగా పనిచేస్తున్నాయి. ద్రవ్యోల్బణం పెరిగినప్పుడు లేదా ఆర్థిక వ్యవస్థలో అనిశ్చితి నెలకొన్నప్పుడు.. ఇన్వెస్టర్లు తమ సంపదను రక్షించుకోవడానికి భౌతిక ఆస్తుల వైపు మొగ్గు చూపుతారు. వెండి దాని విలువను నిలబెట్టుకోవడంలో, కొన్నిసార్లు ద్రవ్యోల్బణాన్ని మించి రాబడులను ఇవ్వడంలో సమర్థతను చూపించింది. ప్రపంచ ఆర్థిక వ్యవస్థలో హెచ్చుతగ్గులు కొనసాగుతున్నందున, వెండి ఒక సురక్షితమైన పెట్టుబడిగా ముందుకు సాగుతోంది.
పెరుగుతున్న రిటైల్ ఇన్వెస్టర్ల సంఖ్య..
గత కొన్ని సంవత్సరాలుగా సిల్వర్ ETFలు, వెండి కాయిన్స్, సిల్వర్ బార్స్ కొనుగోలులో రిటైల్, సంస్థాగత పెట్టుబడిదారుల ఆసక్తి పెరిగింది. అటు పారిశ్రామికంగా అలాగే ఇటు రిటైల్ వినియోగం పెరుగుదల పెట్టుబడిదారులను ఆకట్టుకుంటోంది.
గోల్డ్ కంటే అందుబాటులో ధరలో సిల్వర్..
పేదల బంగారంగా చెప్పుకునే వెండి చారిత్రాత్మకంగా.. ఒక ఔన్సు బంగారం కొనడానికి ఎంత వెండి అవసరమో తెలిపే బంగారం-వెండి నిష్పత్తి ఒక ముఖ్యమైన సూచిక. ఈ నిష్పత్తి సాధారణంగా 60-80 మధ్య ఉంటుంది. అయితే కొన్నిసార్లు ఇది 100కి పైగా పెరిగినప్పుడు, వెండి బంగారంతో పోలిస్తే తక్కువ అంచనా వేయబడిందని సూచిస్తుంది. ప్రస్తుతం ఈ నిష్పత్తి హెచ్చుతగ్గులకు లోనవుతున్నప్పటికీ.. చారిత్రక సగటు కంటే ఎక్కువ ఉన్నప్పుడు, వెండికి తిరిగి పటిష్టమయ్యే అవకాశం ఉందని సూచిస్తుంది. బంగారం కంటే తక్కువ ధరకు లభ్యం కావడం కూడా చాలా మంది పెట్టుబడిదారులకు వెండి కొనుగోళ్ల వైపుకు ఆకట్టుకుంటోంది.
