- రెండేండ్లలో కేసీఆర్
- మళ్లీ సీఎం అవుతరు: కేటీఆర్
హైదరాబాద్, వెలుగు: రాష్ట్రంలో రెండేండ్లలో అధికారంలోకి వచ్చేది బీఆర్ఎస్ పార్టీయేనని.. కేసీఆర్ మళ్లీ సీఎం అవుతారని ఆ పార్టీ వర్కింగ్ ప్రెసిడెంట్ కేటీఆర్ అన్నారు. తాము అధికారంలోకి వచ్చాక.. ఇప్పుడు ఎగిరెగిరి పడుతున్న వాళ్ల బెండు తీస్తామని హెచ్చరించారు. కాంగ్రెసోళ్లు ఏదో అడ్డమారిగుడ్డిసూటిలో అధికారంలోకి వచ్చారని, అంతదానికే ఎగిరెగిరి పడుతున్నారని మండిపడ్డారు. ఆదివారం పాశం యాదగిరి కూతురు పల్లవి, అల్లుడు అంజిబాబు కేటీఆర్ సమక్షంలో బీఆర్ఎస్లో చేరారు. ఈ సందర్భంగా కేటీఆర్ మాట్లాడారు. పార్టీ ఫిరాయింపులపై మరోసారి సుప్రీంకోర్టుకు వెళ్తామని చెప్పారు. జూబ్లీహిల్స్లో కాంగ్రెస్ను బీఆర్ఎస్ తొలి దెబ్బ కొట్టబోతున్నదని, రెండో దెబ్బ రాజేంద్రనగర్ లేదా ఖైరతాబాద్లో కొడతామని చెప్పారు. కడియం శ్రీహరి ఏ పార్టీలో ఉన్నాడో చెప్పుకోలేని దౌర్భాగ్య స్థితిలో ఉన్నారని, ఆయన దమ్ముంటే ఉప ఎన్నికకు రావాలని సవాల్ విసిరారు.
జూబ్లీహిల్స్ ఎన్నిక ప్రభుత్వ విశ్వసనీయతకు పరీక్ష
జూబ్లీహిల్స్ ఉప ఎన్నిక.. ప్రభుత్వ విశ్వసనీయత, పాలన, శాంతిభద్రతలకు పరీక్ష అని కేటీఆర్ అన్నారు. రెండేండ్లుగా ప్రజలకు ఉపయోగపడే పెద్ద ప్రాజెక్టులన్నింటినీ ప్రభుత్వం నిలిపేస్తున్నదన్నారు. ప్రజలపైకి బుల్డోజర్లను ప్రయోగిస్తున్నదని.. రేవంత్ పాలనలో బుల్డోజర్ రాజ్ వచ్చిందని ఆరోపించారు. బీసీ రిజర్వేషన్లపై ఎలాంటి హోంవర్క్ లేకుండానే రిజర్వేషన్లు ఇచ్చే ప్రయత్నం చేసిందని, కాంగ్రెస్ మోసాన్ని కోర్టు ఎండగట్టిందని విమర్శించారు. కమీషన్ల కోసమే మంత్రులు కొట్లాడుకుంటున్నారని కేటీఆర్ఆరోపించారు.
