- కేయూ వీసీ తాటికొండ రమేశ్
- ముగిసిన మూడు రోజుల సదస్సు
హసన్‌పర్తి, వెలుగు : ఇండియన్ హిస్టరీ కాంగ్రెస్ నిర్వహణతో భవిష్యత్తు తరాలకు ఎంతగానో ఉపయోగం కలుగుతుందని, అలాంటి ఈవెంట్ ను కాకతీయ యూనివర్సిటీలో నిర్వహించడం చరిత్ర పుటల్లో లిఖించదగ్గ సందర్భమని కేయూ వీసీ ప్రొఫెసర్ తాటికొండ రమేశ్ అన్నారు. ఈనెల 28న కేయూ ఆడిటోరియంలో ప్రారంభమైన మూడు రోజుల ఇండియన్ హిస్టరీ కాంగ్రెస్ ముగింపు కార్యక్రమం శనివారం సాయంత్రం జరిగింది. ముగింపు ఉత్సవానికి డిప్యూటీ సీఎం మల్లు భట్టి విక్రమార్క, ఉమ్మడి జిల్లా మంత్రులు కొండా సురేఖ, సీతక్క హాజరు కావాల్సి ఉండగా.. వివిధ కారణాల వల్ల వారు అటెండ్ కాలేకపోయారు.
దీంతో కేయూ రిజిస్ట్రార్ శ్రీనివాస రావు అధ్యక్షతన ముగింపు సమావేశం నిర్వహించారు. చీఫ్ గెస్ట్ గా వీసీ రమేశ్ హాజరై మాట్లాడారు. ఈ కార్యక్రమంలో ఫలప్రదమైన చర్చలు, ప్రసంగాలు జరిగాయన్నారు. వాటితో నూతన విజ్ఞానం కలగడంతో పాటు ఆలోచనల మార్పిడి జరిగిందని, ఈ పరిణామాలు భవిష్యత్తు తరాలకు ఉపయోగపడతాయన్నారు. వివిధ సెషన్లలో చరిత్ర పరిశోధకులు 1,146కి పైగా పరిశోధన పత్రాలు సమర్పించారన్నారు.
సెమినార్ హాల్కు ఆచార్య బొబ్బిలి పేరు
కేయూ హిస్టరీ విభాగానికి, దేశ చరిత్ర విభాగాల అకాడమిక్ సంస్థలకు దివంగత రిటైర్డ్ ప్రొఫెసర్ బొబ్బిలి విశిష్ట సేవలందించారని వీసీ రమేశ్ అన్నారు. ఆయన జ్ఞాపకార్థం హిస్టరీ డిపార్ట్మెంట్ సెమినార్ హాల్కు ‘ఆచార్య బొబ్బిలి సెమినార్ హాల్’ గా నామకరణం చేశారు. అనంతరం వర్సిటీ నూతన సంవత్సర క్యాలెండర్, డైరీలను ఆవిష్కరించారు.
ముగింపు సమావేశంలో ఇండియన్ హిస్టరీ కాంగ్రెస్ జనరల్ ప్రెసిడెంట్ ప్రొఫెసర్ ఆదిత్య ముఖర్జీ, ప్రతినిధులు ఎస్ఏ నదీం రెజావి, ఎస్ రేఘి, జాఫ్రీ, ఎస్. శ్రీనాథ్ తదితరులను వీసీ సత్కరించారు. ఈ కార్యక్రమంలో ఇండియన్ హిస్టరీ కాంగ్రెస్ లోకల్ సెక్రటరీ ప్రొఫెసర్ టి.మనోహర్, డాక్టర్ వల్లాల పృథ్వీరాజ్ తదితరులు పాల్గొన్నారు.
