లక్నో: ఉత్తర్ ప్రదేశ్ అసెంబ్లీ ఎన్నికల చివరి దశ పోలింగ్కు సర్వం సిద్ధమైంది. సోమవారం ఉదయం 7 గంటల నుంచి సాయంత్రం 6 గంటల వరకు పోలింగ్ కొనసాగనుంది. ఆఖరి విడతలో ఆజంఘడ్, మావు, జౌన్‌పూర్, ఘాజీపూర్, చందౌలీ, వారణాసి, మీర్జాపూర్, బదోహి, సోన్‌భద్ర జిల్లాల్లోని 54 అసెంబ్లీ నియోజకవర్గాల్లో ఓటింగ్ జరగనుంది. వీటిలో 11 షెడ్యూల్ కులాలు, 2 సీట్లు షెడ్యూల్ తెగలకు కేటాయించారు. 2.06కోట్ల మంది ఓటర్లు 613 మంది అభ్యర్థుల భవితవ్యాన్ని ఈవీఎంలలో నిక్షిప్తం చేయనున్నారు. ప్రధాని నరేంద్రమోడీ సొంత నియోజకవర్గమైన వారణాసిలో ఈ విడతలోనే పోలింగ్ జరగనుంది. ఈ నేపథ్యంలో ప్రధాని రెండు రోజుల పాటు వారణాసిలోనే ఉండి ప్రచారం నిర్వహించారు.
2017లో ప్రస్తుతం చివరి దశ ఎన్నికలు జరుగుతున్న 54 నియోజకవర్గాల్లో 29 బీజేపీ ఖాతాలో వేసుకోగా.. , సమాజ్ వాదీ పార్టీ 11, అప్నాదళ్ 4, ఎబీఎస్పీ 3 సీట్లు గెలుచుకున్నాయి. ఉత్తర్ ప్రదేశ్లో మొత్తం 403 అసెంబ్లీ స్థానాలు ఉండగా.. గత ఆరు విడతల్లో 349 సీట్లలో ఓటింగ్ ముగిసింది. సోమవారం రాత్రి 7 గంటలకు ఎగ్జిట్ పోల్స్ వెలువడనున్నాయి. రేపటితో ఐదు రాష్ట్రాలకు సంబంధించి రెండు నెలలుగా జరుగుతున్న పోలింగ్ పక్రియ పూర్తి కానుంది. మార్చి 10న ఫలితాలు వెలువడనున్నాయి.
