సెలవులొస్తే చాలు ఎగిరి గంతేస్తాం. ఎక్కడికెళ్దామా.. అని ప్లాన్స్ వేసుకుంటాం. సినిమాలు, షికార్లు, టూర్లు, పార్టీలు.. ఏది కుదిరితే అది చేయడానికి రెడీ. సెలవులొచ్చాయ్… ఎవరూ ఎగిరి గెంతడం లేదు. ఎక్కడికెళ్దామనే ముచ్చటే లేదు. సినిమాలు, షికార్లు, టూర్లు, పార్టీలు.. ఏదీ ప్లాన్ చేయడంలేదు. ఎందుకంటే.. ఇప్పుడొచ్చిన సెలవులు ఎప్పుడూ వచ్చేవి కావు. ఇవి ‘కరోనా’ హాలిడేస్. మరి ఈ పది పదిహేను రోజులు ఏం చేద్దాం?
నిజమే.. ప్రాబ్లమ్ వచ్చాక ఇబ్బంది పడేకంటే, రాకముందే జాగ్రత్తగా ఉండాలి. కరోనా వంటి అంటువ్యాధుల విషయంలో మరింత జాగ్రత్తగా ఉండడం అవసరం. అందుకోసమే స్కూళ్లకు, కాలేజీలకు సెలవులు ప్రకటిస్తున్నాయి ప్రభుత్వాలు. సినిమా హాల్స్, ఫంక్షన్ హాల్స్ కూడా బంద్ పెడుతున్నారు.
ప్రభుత్వం తీసుకున్న నిర్ణయం వల్ల స్టూడెంట్స్కు, సినిమా హాల్స్లో పనిచేసే సిబ్బందికి సెలవులొచ్చాయి. అయితే ఈ సెలవులను మిగతా సెలవుల్లాగే ఎంజాయ్ చేయడానికి లేదు. వీలైనంతగా ఇంటికే పరిమితం కావడానికే సెలవులు ఇచ్చారు. సెలవులు దొరికాయి కదా అని ఏవేవో ప్లాన్ చేసుకుంటే లేనిపోని సమస్యలు రావొచ్చు. అందుకే ఇంట్లో ఉండడానికి దొరికిన ఈ సమయాన్ని చక్కగా వాడుకోవచ్చు. ఎట్లనంటే..
‘హోంవర్క్’ చేద్దాం
తీరిక లేకనో, పనిఒత్తిడి కారణంగానో ఎన్నో పనులు వాయిదా వేస్తుంటాం. ఇల్లు సర్దుకోవడం, పాతబట్టలు పక్కకు తీసేద్దామనుకోవడం, బుక్ షెల్ఫ్ను సెట్ చేసుకోవడం, ఇంటిని డెకొరేట్ చేసుకోవడం.. చిన్న చిన్న రిపేర్లు ఏమైనా అవసరముంటే దొరికిన ఈ సమయంలో అవన్నీ కంప్లీట్ చేసుకోవచ్చు.
బుక్స్ చదువుదాం
బయటకు వెళ్లకుండా ఇంట్లోనే ఉండి చేసే గొప్ప పని పుస్తకాలు చదువుకోవడం. మంచి పుస్తకమని కొనుక్కొచ్చి షెల్ఫ్కే పరిమితం చేసిన పుస్తకాలు కొన్ని ఉంటాయి. వాటిని ఈ టైంలో బయటకు తీసి చదివేయొచ్చు. ఒకవేళ రాసే ఆసక్తి ఏదైనా ఉంటే కూడా ప్రయత్నించడానికి ఇదే మంచి టైం.
గార్డెనింగ్
గార్డెనింగ్ కొంచెం ఓపికగా చేయాల్సిన పని. పైగా ఒక్కరోజులో పూర్తయ్యే పనికూడా కాదు. ఒకరోజు మొక్కలు నాటి, మరుసటి రోజు నుంచి పట్టించుకోకుండా ఉంటే లాభం లేదు. కనీసం ఓ పదిరోజులపాటైనా వాటి బాగోగులు చూసుకోవాలి. అందుకు ఇప్పుడు దొరికిన ఖాళీ సమయాన్ని బాగా ఉపయోగించుకోవచ్చు.
సెలవు పెట్టొచ్చు
పిల్లలకే సెలవులిచ్చారు.. ఉద్యోగాలు తల్లిదండ్రులకు మాత్రం రెగ్యులర్ డ్యూటీనే ఉంటుంది. అలాంటివాళ్లు ఉన్న సెలవుల్లో కొన్నింటిని ఇప్పుడు వాడుకోవచ్చు. ఒకవేళ పేరెంట్స్ ఇద్దరికీ ఒకేసారి సెలవులు దొరికే అవకాశం లేకపోతే ఒకరు కొన్నిరోజులు, మరొకరు ఇంకొన్నిరోజులు సెలవులు పెట్టాలి. అప్పుడు పిల్లల్ని ఒంటరిగా ఉంచిన ఫీలింగ్ ఉండదు. పిల్లలతో టైం గడిపినట్టూ ఉంటుంది.
కొత్తగా ఏమైనా నేర్చుకుందాం
సంగీతం, డ్రాయింగ్, పెయింటింగ్ వంటివి కాకపోయినా.. కొత్త వంటలు నేర్చుకోవడానికి కూడా ఇది చాలా మంచి టైం. పైగా పిల్లలు ఇంట్లోనే ఉంటారు కాబట్టి వాళ్లకూ కొత్తగా ఏదైనా చేసిపెట్టినట్లు ఉంటుంది. కావాలనుకుంటే కుకింగ్లో వాళ్ల హెల్ప్ కూడా తీసుకోవచ్చు. అంతేకాదు.. కుట్లు, అల్లికలు వంటివి కూడా నేర్చుకోవచ్చు.
పిల్లలకు ఏదైనా నేర్పడానికి
స్కూల్ డేస్లో హోంవర్క్తోనే పిల్లలకు సరిపోతుంది. ఇక వాళ్లకు కొత్తగా ఏదైనా నేర్పుదామంటే టైం ఎక్కడిది. కానీ ఇప్పుడు టైం దొరికింది. కంట్రీస్ అండ్ క్యాపిటల్స్ పేర్లు నేర్పుతారో, ఏదైనా మంచి పాట నేర్పుతారో లేదంటే కథలు చెబుతారో మీ ఇష్టం. పిల్లలకు నచ్చినవి చెప్పొచ్చు.
