ఘజియాబాద్ : స్కూల్ ప్రిన్సిపాల్ తమను లైంగికంగా వేధిస్తున్నాడంటూ ఘజియాబాద్లోని ఓ స్కూల్ విద్యార్థినులు ఉత్తరప్రదేశ్ సీఎం యోగి ఆదిత్యనాథ్కు రక్తంతో లేఖ రాశారు. తమకు న్యాయం చేయాలని కోరారు. ప్రిన్సిపాల్ రాజీవ్ పాండే ఏదో ఒక సాకుతో అమ్మాయిలను తన ఆఫీస్కు రమ్మని పిలిచి, వాళ్లను అనుచితంగా తాకుతున్నట్లు ఆరోపణలు వచ్చాయి. 12 నుంచి 13 ఏండ్ల మధ్య వయసున్న ఈ స్టూడెంట్లు మొదట ఈ విషయాన్ని చెప్పేందుకు భయపడ్డారు. ప్రిన్సిపాల్ ప్రవర్తన మారకపోవడంతో తల్లిదండ్రులు దృష్టికి తీసుకెళ్లగా విషయం బయటపడింది.
ప్రిన్సిపాల్ను చితకబాదిన్రు
పిల్లలతో కలిసి తల్లిదండ్రులంతా స్కూల్ వద్ద ఆందోళనకు దిగారు. ప్రిన్సిపాల్ రాజీవ్ను నిలదీశారు. ఈ సమయంలో విద్యార్థినులతో పాటు తల్లిదండ్రులపై దురుసుగా ప్రవర్తించిన ప్రిన్సిపాల్కు దేహశుద్ధి చేశారు. దీంతో అతడికి గాయాలయ్యాయి. అనంతరం విద్యార్థినుల తల్లిదండ్రులపై ప్రిన్సిపాల్ ఫిర్యాదు చేయడంతో.. పోలీసులు తల్లిదండ్రులతో పాటు రాజీవ్పైనా కేసు ఫైల్ చేసి దర్యాప్తు ప్రారంభించారు. తమకు అన్యాయం జరుగుతోందని, ప్రిన్సిపాల్పై వెంటనే చర్యలు తీసుకోవాలంటూ స్టూడెంట్లు యోగికి రక్తంతో లేఖ రాశారు. ‘ప్రిన్సిపాల్ వేధింపులకు గురవుతున్న మేమంతా మీతో వ్యక్తిగతంగా మాట్లాడాలనుకుంటున్నాం. మిమ్మల్ని కలిసేందుకు మాకు, మా తల్లిదండ్రులకు అపాయింట్మెంట్ ఇవ్వండి. మేమంతా మీ బిడ్డలమే, మాకు న్యాయం చేయండి”అని లేఖలో పేర్కొన్నారు.
