డయాబెటిస్ వచ్చిందంటే.. హెల్త్ ప్రాబ్లమ్స్ ఒక్కొక్కటిగా వస్తుంటాయి . డయాబెటిస్ కంట్రోల్లో లేనివాళ్లకు ఆరోగ్య సమస్యలు వచ్చే అవకాశం ఎక్కువ. కారణం... ఇమ్యూనిటీ తక్కువ ఉండడంతో పాటు గ్లూకోజ్ లెవల్స్ ఎక్కువ కావడమే. అంతేకాదు వీళ్లలోనే యూరినరీ ట్రాక్ ఇన్ఫెక్షన్లు (మూత్ర నాళ సంబంధిత సమస్యలు) ఎక్కువ కనిపిస్తాయి. అందుకు కారణం తెలుసుకునేందుకు ఈ మధ్యే గ్లూకోజ్ ఎఫెక్ట్ మీద స్వీడన్లోని కరోలిన్స్కా ఇనిస్టిట్యూట్కి చెందిన రీసెర్చర్లు ఒక స్టడీ చేశారు. ఈ స్టడీ కోసం ప్రి–డయాబెటిక్, డయాబెటిక్ కంట్రోల్లో లేని వాళ్లు, ఆరోగ్యంగా ఉన్నవాళ్ల యూరిన్, యూరినరీ బ్లాడర్ సెల్స్తో పాటు బ్లడ్ సీరమ్ శాంపిల్స్ని పరిశీలించారు. ఆరోగ్యంగా ఉన్నవాళ్లతో పోల్చితే ప్రి–డయాబెటిక్, డయాబెటిక్ కంట్రోల్లో లేనివాళ్లలో సొరియాసిన్ ప్రొటీన్ తక్కువ ఉండడం గమనించారు.
బ్యాక్టీరియా పెరగడానికి...
సొరియాసిన్ అనేది యూరినరీ ట్రాక్ ఇన్ఫెక్షన్లు రాకుండా కాపాడుతుంది. అంతేకాదు కొన్నిరకాల బ్యాక్టీరియల్ ఇన్ఫెక్షన్లని అడ్డుకుంటుంది కూడా. రక్తంలో చక్కెర శాతం ఎక్కువ ఉండడం వల్ల శరీరంలో ఉండే సొరియాసిన్ తగ్గుతుంది. రక్తంలో చక్కెర శాతం పెరిగితే అది మూత్రం (యూరిన్)లో కలుస్తుంది. యూరిన్లో చక్కెర ఉంటే బ్యాక్టీరియా వేగంగా పెరుగుతుంది. దాంతో మూత్రనాళ సంబంధిత ఇన్ఫెక్షన్లు వచ్చే అవకాశం ఎక్కువ. డయాబెటిస్ ఉన్న మహిళలకు మెనోపాజ్ దశలో యూరినరీ ట్రాక్ ఇన్ఫెక్షన్లు రావడం గమనించారు. కారణం.. వీళ్లలో ఈస్ట్రోజన్ హార్మోన్ తగినంత తయారుకాకపోవడమే. అందుకని వీళ్లు ఈస్ట్రోజన్ క్రీమ్ ఉపయోగిస్తే సొరియాసిన్ యాంటీబయాటిక్ లెవల్స్ పెరిగి, సమస్య తగ్గుతుందని చెప్తున్నారు రీసెర్చర్లు.
