ఖైరతాబాద్, వెలుగు: ఎన్నికల సంఘం నోటాకు పవర్ తీసుకురావాలని ‘ఫోరం ఫర్ గుడ్ గవర్నెన్స్’ (ఎఫ్జీజీ) అధ్యక్షుడు ఎం.పద్మనాభరెడ్డి అన్నారు. హర్యానా ప్రభుత్వం నోటా ప్రాధాన్యతను గుర్తించిందని.. తెలంగాణలోను స్థానిక సంస్థల ఎన్నికలలో నోటాకు అంతే గుర్తింపును తీసుకురావాలని తెలిపారు. మంగళవారం ‘పంచాయతీ ఎన్నికల్లో నోటా అమలు’ అనే అంశంపై సోమాజిగూడ ప్రెస్ క్లబ్లో రౌండ్ టేబుల్ సమావేశం జరిగింది.
ఈ సందర్భంగా పద్మనాభరెడ్డి మాట్లాడారు. ఎన్నికల్లో పోటీ చేసిన అభ్యర్థుల కంటే నోటాకు ఎక్కువ ఓట్లు వస్తే ఆ ఎన్నికను రద్దు చేయాలని చెప్పారు. త్వరలో జరగనున్న స్థానిక సంస్థల ఎన్నికల్లో నోటాకు ప్రాధాన్యం కల్పించాలని పేర్కొన్నారు. కొన్ని గ్రామాల్లో సర్పంచులను వేలం ద్వారా పెత్తందారులు కొంటున్నారని ఆరోపించారు. అప్పుడు సామాన్యుడు ఓటు హక్కును వినియోగించే అవకాశాన్ని కోల్పోతాడని వెల్లడించారు. ఈ కార్యక్రమంలో ఎన్నికల సంఘం మాజీ కమిషనర్ నాగిరెడ్డి, ఎఫ్జీజీ కార్యదర్శి సోమ శ్రీనివాస్ రెడ్డి, ఉపాధ్యక్షుడు గోపాల్ రెడ్డి, జాయింట్ సెక్రటరీ భాస్కర్ రెడ్డి, లోక్సత్తా ఉద్యమ సంస్థ తెలంగాణ అధ్యక్షుడు బండారు రామ్మోహన్ రావు, సంస్థ కోశాధికారి శ్రీదేవి, హన్మంతరావు, అబ్దుల్ కరీమ్, విద్య, వివి. రావ్ తదితరులు పాల్గొన్నారు.
