రేప్ కేసు వెనక్కి తీసుకోలేదని భార్యాభర్తలపై విచక్షణా రహితంగా దాడి చేశారు ఎనిమిది మంది దుండగులు. ఆటోలో వెళ్తుండగా అడ్డుకొని.. వారి దుస్తులు చించేసి.. పైన పెట్రోల్ పోసి బెల్టుతో కొట్టారు. మహారాష్ట్రలోని ఔరంగాబాద్‌లో గత నెల 24న జరిగిన ఈ ఘటన ఆలస్యంగా బయటకి వచ్చింది. దీనికి సంబంధించిన వీడియో సోషల్ మీడియాలో వైరల్ కావడంతో ఆ ఎనిమిది మందిపై కేసు నమోదు చేసి, గాలిస్తున్నట్లు మంగళవారం నాడు పోలీసులు తెలిపారు.
మహిళ సోదరుడు, బావ..
గత నెల 24వ తేదీ రాత్రి 8.20 గంటల సమయంలో ఆ మహిళ (29), ఆమె భర్త ఆటోలో వెళ్తుండగా.. ఔరంగాబాద్ ప్రభుత్వ హాస్పిటల్ దగ్గర 8 మంది బ్యాచ్ అడ్డుకుంది. వారిని ఆటోలో నుంచి బయటకు లాగి.. పక్కనే ఉన్న ఓ రూమ్‌లోకి లాక్కెళ్లారు. అక్కడ వాళ్లు ఆ ఇద్దరి దుస్తులు చించేసి.. పైన పెట్రోల్ పోసి చంపుతామని బెదిరించారు. బెల్టుతో తీవ్రంగా హింసించారు. 2016లో ఆ మహిళపై ఈ ఎనిమిది మందిలో కొందరు రేప్ చేశారు. వారిపై నాడు ఆమె పెట్టిన కేసును విత్ డ్రా చేసుకోవాలంటూ ఈ రకంగా దాడి చేశారు. ఈ గ్యాంగ్‌లో ఆ మహిళ సోదరుడు, ఇద్దరు బావలు, మరికొందరు గుర్తు తెలియని వ్యక్తులు ఉన్నారు. వీరిలో కొందరు తాము పోలీసులమని చెప్పి ఆటోను అడ్డుకున్నారు. ఈ దాడి ఘటనకు సంబంధించిన వీడియో సోమవారం సోషల్ మీడియాలో వైరల్ కావడంతో పోలీసుల దృష్టికి వెళ్లింది. దీంతో మంగళవారం వారు బాధితుల ఇంటికి వెళ్లి వివరాలు తీసుకుని.. ఆ దుర్మార్గులపై హత్యాయత్నం కేసు నమోదు చేశారు. ఆ ఎనిమిది మంది పరారీలో ఉన్నారని, వారిని గాలిస్తున్నామని ఎస్పీ సాగర్ పాటిల్ చెప్పారు.
