- ఎకానమీ నెమ్మదించడమే కారణం
- పెరిగిన ధరలు వెల్లడించిన సీఎంఏఐ సర్వే
న్యూఢిల్లీ: ఈసారి పండుగ సీజన్లో దుస్తుల(అప్పారెల్) అమ్మకాలు గత సంవత్సరంలో పోలిస్తే 25 శాతం తక్కువగా ఉండొచ్చని తయారీ సంస్థలు, రిటైలర్లు చెబుతున్నారు. దుస్తుల అమ్మకాల పోకడలు తెలుసుకోవడానికి క్లాతింగ్ మానుఫాక్చరింగ్ అసోసియేషన్ ఆఫ్ ఇండియా (సీఎంఏఐ) చేసిన సర్వే ద్వారా ఈ విషయం తెలిసింది. ఇందుకోసం అసోసియేషన్ 166 మానుఫాక్చరర్లను, బ్రాండ్లను సర్వే చేసింది.
వీరిలో 78 శాతం మంది రెస్పాండెంట్లు ఈసారి అమ్మకాలు తక్కువగా ఉంటాయని చెప్పారు. కేవలం 25 శాతం మంది మాత్రం అమ్మకాల గురించి సానుకూలంగా మాట్లాడారు. ధరలు ఎక్కువగా ఉండటం, ఎకానమీ నెమ్మదించడం ఈ పరిస్థితికి కారణమని అసోసియేషన్ తెలిపింది. అమ్మకాలు తగ్గడానికి ఎకానమీ నెమ్మదించడమే కారణమని 30 శాతం మంది రెస్పాండెంట్లు చెప్పారు. పదహారు శాతం మంది అభిప్రాయాలు ఇందుకు విరుద్ధంగా ఉన్నాయి. గత ఏడాది మాదిరిగానే ఈసారి అమ్మకాలు పెరగొచ్చని వాదించారు. మనదేశంలో సాధారణంగా అక్టోబరు–డిసెంబరు మధ్య పండుగ సీజన్ ఉంటుంది.
ఈ సమయంలో గిరాకీని పెంచుకోవడానికి రిటైలర్లు ఆఫర్లు, డిస్కౌంట్లు ఇస్తుంటారు. ప్రకటనల కోసం భారీగా ఖర్చు చేస్తుంటారు. "దాదాపు 49శాతం మంది రెస్పాండెంట్లు పిల్లల దుస్తుల వల్ల అమ్మకాల్లో పెరుగుదల ఉంటుందని భావిస్తున్నారు. అయితే 36శాతం మంది మహిళల దుస్తులకు డిమాండ్ బాగుంటుందని అన్నారు. కేవలం12శాతం మం ది పురుషుల దుస్తుల అమ్మకాలు బాగుంటాయని చెప్పారు. టైర్-–2, టైర్–-3 నగరాలు అమ్మకాల్లో మెట్రోలను అధిగమిస్తాయని అంచనా. దాదాపు 80శాతం మంది రెస్పాండెంట్లు ఈ వాదనను సమర్థించారు" అని సర్వే రిపోర్టు పేర్కొంది.
గత మూడు లేదా నాలుగు రోజులుగా కొంత సానుకూల సెంటిమెంట్ ఉన్నప్పటికీ, సీఎంఏఐ సభ్యులలో నిరాశావాదమే ఎక్కువగా కనిపిస్తోందని అసోసియేషన్ చీఫ్ మెంటర్ రాహుల్ మెహతా అన్నారు. “ గత నాలుగైదు నెలల్లో దేశీయ గార్మెంట్ రంగంలో మందగమనం కనిపిస్తోంది. రాబోయే మ్యారేజ్ సీజన్ను పరిగణనలోకి తీసుకుంటే, దీపావళి తర్వాత మార్కెట్ పెరుగుతుందని అంచనా వేస్తున్నాం.
పండుగ సీజన్లో ఆఫ్లైన్ స్టోర్లు మెరుగ్గా పనిచేస్తాయని 60శాతం మంది రెస్పాండెంట్లు భావిస్తున్నారు. అయితే 40శాతం మంది ఆన్లైన్ పోర్టల్లు మెరుగ్గా పనిచేస్తాయని అన్నారు”అని మెహతా వివరించారు.