భద్రాద్రికొత్తగూడెం, వెలుగు: ప్రజా యుద్దనౌక గద్దర్ గొంతుకే పోరు తెలంగాణకు ఆయుధంగా మారిందని పలువురు అఖిలపక్ష నేతలు అన్నారు. భద్రాద్రికొత్తగూడెం జిల్లా కొత్తగూడెం క్లబ్లో అఖిలపక్షం, ప్రజా సంఘాల ఆధ్వర్యంలో ఆదివారం ఏర్పాటు చేసిన ప్రోగ్రాంలో గద్దర్తో పాటు సియాసత్ ఉర్ధూ పత్రిక మేనేజింగ్ ఎడిటర్ జహీర్ అలీఖాన్కు రాజకీయ పార్టీల రాష్ట్ర నేతలు, కవులు, కళాకారులు ఘనంగా సాంస్కృతిక నివాళులు అర్పించారు. ఈ సందర్భంగా సీపీఐ రాష్ట్ర కార్యదర్శి కూనంనేని సాంబశివరావు, న్యూడెమోక్రసీ కేంద్ర కమిటీ సభ్యులు సాధినేని వెంకటేశ్వరరావు, సీపీఎం రాష్ట్ర నాయకులు రాములు, గద్దర్ కుమార్తె డాక్టర్ వెన్నెల, రచయిత జయరాజ్ మాట్లాడారు.
దొరల గడీల పాలనపై ప్రజలను చైతన్యం చేసిన గొప్ప వ్యక్తి గద్దర్ అని అన్నారు. ప్రజల మాటలనే పాటలుగా అల్లిన ప్రజా కవి గద్దర్ అని అన్నారు. తెలంగాణ ప్రత్యేక పోరులో సాంస్కృతిక ప్రోగ్రాంల ద్వారా ప్రజల్లో చైతన్యాన్ని రగిల్చిన గొప్ప వ్యక్తి గద్దర్ అని అన్నారు. ప్రజా సమస్యలు ఎక్కడ ఉంటే అక్కడే ప్రజా గొంతుకగా గద్దర్ ఉండేవారన్నారు. ప్రజలను తన పాటలు, మాటలతో చైతన్యం చేశారని, ఆయన లేని లోటు తీర్చలేనిదన్నారు. సాంస్కృతిక విప్లవానికి ఐకాన్గా గద్దర్ నిలిచారన్నారు.
హిందూ, ముస్లీం మతోన్మదాన్ని వ్యతిరేకించిన లౌకిక, ప్రజాస్వామ్య వాది జహీర్ అలీఖాన్ అని అన్నారు. ఈ ప్రోగ్రాంలో సీపీఐ, సీపీఎం, కాంగ్రెస్, న్యూడెమోక్రసీ, టీవీపీఎస్, ప్రజాసంఘాల నేతలు కాసాని ఐలయ్య, ఎస్కె. సాబీర్ పాషా, అన్నవరపు కనకయ్య, శౌరి, రామనాదం, గొల్లపల్లి దయానంద్, ఆవునూరి మదు, ముద్ద బిక్షం, గుండపనేని సతీష్, కె. శ్రీనివాస్, బందెల నర్సయ్య పాల్గొన్నారు. ఈ సందర్భంగా ఎస్. పాల్, బల్లేపల్లి మోహన్, మిట్టపల్లి సురేందర్ కళా బృందాలు గద్దర్ పాటలతో అలరించాయి.
