భారత స్టాక్ మార్కెట్లు శుక్రవారం రక్తసిక్తంగా మారాయి. అంతర్జాతీయంగా నెలకొన్న ఉద్రిక్తతలు, ముఖ్యంగా ఇరాన్ యుద్ధం ముగిసే సూచనలు కనిపించకపోవడంతో ఇన్వెస్టర్లు బెంబేలెత్తిపోయారు. దీనికి తోడు క్రూడ్ ధరలు భగ్గుమనటం, రూపాయి విలువ పాతాళానికి పడిపోవడం మార్కెట్లను కుప్పకూల్చాయి. ట్రేడింగ్ ముగిసే సమయానికి సెన్సెక్స్ 1,690 పాయింట్లు, నిఫ్టీ 486 పాయింట్ల నష్టంతో క్లోజ్ అయ్యాయి. ఒక దశలో నిఫ్టీ కీలకమైన 22,900 స్థాయిని కూడా కోల్పోవడం మార్కెట్ బలహీనతను స్పష్టం చేసింది.
ఈ భారీ పతనానికి ప్రధానంగా 'ప్రాఫిట్ బుకింగ్' ఒక కారణమైతే.. భౌగోళిక రాజకీయ పరిస్థితులు మరో ప్రధాన కారణం. గత రెండు సెషన్లలో మార్కెట్లు 3.5% పెరగడంతో, ఇన్వెస్టర్లు లాభాలను వెనక్కి తీసుకునేందుకు మొగ్గు చూపారు. మొత్తం 16 ప్రధాన రంగాలలో 15 రంగాలు నష్టాలను చవిచూశాయి. ముఖ్యంగా బ్యాంకింగ్ రంగంపై అమ్మకాల ఒత్తిడి తీవ్రంగా ఉంది. ఎస్బీఐ, యాక్సిస్ బ్యాంక్, హెచ్డీఎఫ్సీ బ్యాంక్ వంటి దిగ్గజ షేర్లు 1-3% మేర పతనమయ్యాయి. టాటా మోటార్స్ అత్యధికంగా నష్టపోయిన షేర్లలో ఒకటిగా నిలిచింది. అయితే చమురు ధరల పెరుగుదల నేపథ్యంలో ఓఎన్జీసీ మాత్రం 4.7% లాభపడి టాప్ గెయినర్గా నిలిచింది.
అంతర్జాతీయంగా చూస్తే.. ఇరాన్ యుద్ధం ఇప్పుడప్పుడే ఆగిపోయేలా లేదని అమెరికా రక్షణ శాఖ పెంటగాన్ అదనంగా 10వేల మంది సైనికులను మధ్యప్రాచ్యానికి పంపే యోచనలో ఉండటం మార్కెట్లను భయపెట్టింది. అమెరికా అధ్యక్షుడు ట్రంప్ చర్చలు బాగున్నాయని చెబుతున్నా.. ఇరాన్ మాత్రం అమెరికా ప్రతిపాదనలను తిరస్కరించడం యుద్ధ మేఘాలను మరింత కమ్ముకునేలా చేసింది. దీనివల్ల బ్రెంట్ క్రూడ్ ధర బ్యారెల్కు 108 డాలర్ల వద్ద కొనసాగుతోంది. చమురు ధరలు ఇలాగే ఉంటే భారత్ దిగుమతి బిల్లు పెరిగి ఆర్థిక వ్యవస్థపై భారం పడుతుందని నిపుణులు హెచ్చరిస్తున్నారు.
మరోవైపు భారత రూపాయి విలువ డాలర్తో పోలిస్తే చారిత్రక కనిష్ట స్థాయి 94.7కు పడిపోవడం మదుపర్ల ఆందోళనను రెట్టింపు చేసింది. విదేశీ ఇన్వెస్టర్లు నిరంతరం విక్రయాలు జరుపుతుండటంతో రూపాయిపై ఒత్తిడి పెరుగుతోంది. మార్కెట్ అస్థిరతను సూచించే 'ఇండియా VIX' 7.5% పెరిగి 26.53 వద్దకు చేరింది. యుద్ధం సుదీర్ఘకాలం కొనసాగితే తప్ప మార్కెట్లలో స్థిరత్వం రాదని, భారత్ వంటి దేశాలకు చమురు ధరలే కీలకంగా మారతాయని ఆందోళనలు పెరుగుతాయి.
