లండన్: వెదురుతో క్రికెట్ బ్యాట్లను తయారు చేయాలన్న ఆలోచనను మెరిల్‌బోన్ క్రికెట్క్లబ్(ఎంసీసీ) కొట్టి పారేసింది. ప్రస్తుతం క్రికెట్ రూల్స్ ప్రకారం అలాంటి బ్యాట్లు వాడడం చట్ట విరుద్ధమని తేల్చి చెప్పింది. అయితే ఈ విషయంపై తమ లా- సబ్ కమిటీ మీటింగ్లో కూలంకషంగా చర్చిస్తామని క్రికెట్ రూల్స్ను సంరక్షించే ఎంసీసీ తెలిపింది. ప్రస్తుతం ఇంగ్లిష్ విల్లో (చెక్క), కాశ్మీర్ విల్లో తయారు చేసిన బ్యాట్లనే ప్రపంచ వ్యాప్తంగా వాడుతున్నారు. కానీ ఆ చెక్కకు బదులు వెదురును ఉపయోగించి తక్కువ ఖర్చుతో బ్యాట్లు తయారు చేయొచ్చని, పైగా రెగ్యులర్బ్యాట్లతో పోలిస్తే ఇవి మరింత స్ట్రాంగ్‌గా ఉంటాయని యూనివర్సిటీ ఆఫ్ కేంబ్రిడ్జ్ చేసిన ఓ అధ్యయనంలో తేలింది. అయితే ఐసీసీ రూల్‌ 5.3.2 ప్రకారం కేవలం వుడ్‌తో చేసిన బ్యాట్లను మాత్రమే క్రికెట్‌లో వినియోగించాలి. ప్రత్యామ్నాయంగా వెదురుతో బ్యాట్లను తయారు చేయాలంటే ముందుగా రూల్స్ను మార్చాల్సి ఉంటుందని ఎంసీసీ ఓ ప్రకటనలో తెలిపింది. వెదురు బ్యాట్లు.. దృఢంగా, మన్నికగా ఉంటాయని, పైగా బ్యాట్‌లో స్వీట్స్పాట్‌ పరిధి ఎక్కువగా ఉంటాయని కేంబ్రిడ్జ్ రీసెర్చ్‌ టీమ్‌ తెలిపింది. దాని వల్ల యార్కర్లను ఈజీగా ఫోర్లుగా కొట్టొచ్చని చెప్పింది. కానీ, ఆటలో బ్యాట్కు బాల్‌కు మధ్య బ్యాలెన్స్‌ దెబ్బతినకుండా జాగ్రత్త పడాల్సి ఉంటుందని ఎంసీసీ చెబుతోంది.
