ముంబై: కులం పేరిట సీనియర్ల వేధింపులను తట్టుకోలేక ఆత్మహత్య చేసుకున్న మెడికల్ పీజీ స్టూడెంట్ పాయల్ తాడ్వి కేసులో పోలీసులు దర్యాప్తు ముమ్మరం చేశారు. ఆమె సూసైడ్ కు కారకులైన ముగ్గురు మహిళా డాక్టర్లను అగ్రిపుర పోలీసులు అరెస్టు చేశారు. హేమ అహుజ, భక్తి మెహర లను మంగళవారం అదుపులోకి తీసుకోగా మరో డాక్టర్ అంకిత ఖండేల్వాల్ ను బుధవారం అరెస్టు చేశారు. ఎస్సీ, ఎస్టీ అట్రాసిటీ, యాంటీ రాగింగ్, ఐటీ యాక్టు, ఐపీసీ సెక్షన్ 360 కింద కేసు నమోదు చేశారు. ముంబైలోని బీవైఎల్ నాయర్ హాస్పిటల్‌లో గైనకాలజిస్టుగా పనిచేస్తున్న పాయల్ తాడ్వీని సీనియర్లు అయిన ఈ ముగ్గురు డాక్టర్లు కులం పేరుతో వేధించేవారు. దీంతో ఆమె మే 22న ఆత్మహత్య చేసుకుంది. ఘటనకు కారకులైన వారిని కఠినంగా శిక్షించాలంటూ పాయల్ పనిచేసిన హాస్పిటల్ బయట ఆమె తల్లిదండ్రులు నిరసన చేప్టటారు. పేషెంట్ల ముందే ఆ ముగ్గురు నిందితులు పాయల్ ముఖంపై ఫైల్లు విసిరికొట్టేవారని, తమ కూతురు తమకు చెప్పిందని పాయల్ తల్లి చెబుతున్నారు. మరోవైపు మహారాష్ట్ర రెసిడెంట్ డాక్టర్స్ అసోసియేషన్ ముగ్గురు నిందితులను సస్పెండ్ చేసింది. వీళ్లు తప్పు చేసినట్లు ఆధారాలు ఉన్నందునే తాము ఈ నిర్ణయం తీసుకున్నట్లు ప్రకటించింది. దర్యాప్తు వివరాలతో పాటు తీసుకున్న చర్యలపై సమగ్ర నివేదిక అందించాలంటూ జాతీయ మహిళా కమిషన్ హాస్పి టల్ కు లేఖ రాసింది.
