హనుమకోండ సిటీ, వెలుగు: పరకాల మహిళా డెయిరీ కార్యకలాపాలు సాగేవిధంగా చర్యలు చేపట్టాలని, పరకాల ఎమ్మెల్యే రేవూరి ప్రకాశ్ రెడ్డి అధికారులకు సూచించారు. మంగళవారం పరకాల డెయిరీ కార్యకలాపాలపై హనుమకొండ కలెక్టరేట్ లో వరంగల్ ఎంపీ కడియం కావ్య, హనుమకొండ, వరంగల్ జిల్లాల కలెక్టర్లు చాహత్ బాజ్ పాయ్, సత్య శారద, డీఆర్డీఏ అధికారులతో కలిసి పరకాల ఎమ్మెల్యే సమీక్ష నిర్వహించారు. ఈ సందర్భంగా పరకాల మహిళా డెయిరీకి సంబంధించిన అంశాలు, బీఎంసీయూల ద్వారా పాల సేకరణ, పాలు, పాల ఉత్పత్తుల మార్కెటింగ్, హెచ్ఆర్ సిబ్బంది నియామకం, తదితర అంశాలపై అధికారులతో ప్రస్తావించారు.
