హైదరాబాద్: హుజురాబాద్ ఎన్నిక ఒక చిన్న ఎన్నిక.. అది అసలు సమస్యే కాదు అని టీఆర్ఎస్ పార్టీ రాష్ట్ర కార్యనిర్వాహక అధ్యక్షుడు, మునిసిపల్ శాఖ మంత్రి కేటీఆర్ అన్నారు. జలవిహార్లో టీఆర్ఎస్ పార్టీ హైదరాబాద్ జిల్లా స్థాయి సమావేశం జరిగింది. ఈ సమావేశంలో పాల్గొన్న మంత్రి కేటీఆర్ పై వ్యాఖ్యలు చేశారు. ఈ సమావేశంలో మంత్రులు తలసాని శ్రీనివాస్ యాదవ్, మహమూద్ అలీ, సబితా ఇంద్రారెడ్డి, మల్లారెడ్డి, పార్టీ సెక్రటరీ జనరల్ శ్రీ కేశవరావు, పార్టీ ఎమ్మెల్యేలు, ఎమ్మెల్సీలు, నాయకులు పాల్గొన్నారు.
‘రాష్ట్రంలో రైతులు, మహిళలు సంతోషంగా ఉన్నారు కాబట్టే.. మనల్ని కడుపునిండా దీవించినరు. అందుకే ఏ ఎన్నిక వచ్చినా గులాబీ జెండాకే జై కొడుతున్నరు. ఎన్నిక ఏదైనా గెలుపు మాత్రం టీఆర్ఎస్కే పట్టం కడుతున్నారు. విపక్షాల నేతలంతా.. పత్రికల్లో పతాక శీర్షీకల కోసం, జనాల్లో ప్రచారం కోసం, నోటి దూల తీర్చుకోవడం కోసం మాత్రమే మాట్లాడుతున్నారు. అందుకే వీళ్లను జనాలెవరూ సీరియస్గా తీసుకోవడంలేదు. రాబోయే రెండున్నరేండ్ల వరకు మనముందు ఏ ఎన్నిక లేదు. ఈ హుజురాబాద్ ఎన్నిక ఒక చిన్న ఎన్నిక. అది అసలు సమస్యే కాదు. అది అక్కడున్న మనవాళ్లే చూసుకుంటరు. మనకు చాలా టైం ఉంది కాబట్టి మనం విపక్షాల చిల్లర మాటలను తిప్పికొట్టాలి’ అని మంత్రి కేటీఆర్ అన్నారు.
