- కేటీఆర్, కవిత ఇక్కడికి దిగుమతి అయ్యిన్రు: ఎమ్మెల్సీ జీవన్రెడ్డి
- తెలంగాణపై మేం ప్రాసెస్ స్టార్ట్ చేశాకే.. అమెరికా నుంచి ఇక్కడికొచ్చిన్రు: జీవన్రెడ్డి
హైదరాబాద్, వెలుగు: తెలంగాణ ఉద్యమం గురించి మంత్రి కేటీఆర్ మాట్లాడుతుంటే నవ్వొస్తున్నదని ఎమ్మెల్సీ జీవన్రెడ్డి అన్నారు. ఆకాశం నుంచి ఊడిపడ్డట్టు కేటీఆర్ మాట్లాడుతున్నారని, తెలంగాణ ఉద్యమం టైంలో కేటీఆర్, కవిత ఎక్కడున్నారని ప్రశ్నించారు. 2004 టైంలో వాళ్లు అమెరికాలో ఉన్నారు. కాంగ్రెస్ తెలంగాణ ప్రాసెస్ను మొదలుపెట్టాకే ఇక్కడికి దిగుమతి అయ్యారని ఎద్దేవా చేశారు.
ఫిషర్మెన్ కాంగ్రెస్ సెల్ చైర్మన్ మెట్టు సాయితో కలిసి బుధవారం ఆయన గాంధీభవన్లో మీడియాతో మాట్లాడారు. ఉద్యమం గురించి కేటీఆర్కు అవగాహన లేదన్నారు. ‘‘అయ్యేది లేదు.. వచ్చేది లేదని తెలంగాణ ఏర్పాటుపై కేటీఆర్ ఆనాడు కామెంట్ చేశారు. ఇప్పుడేమో వాళ్ల వల్ల, వాళ్లు కొట్లాడడం వల్లే వచ్చిందని అంటున్నరు. ఏపీలో నష్టపోతామని తెలిసినా కాంగ్రెస్ పార్టీ రాష్ట్రాన్ని ఏర్పాటు చేసింది.
ALSO READ:ఉజ్వల స్కీమ్ కింద.. మరో 75 లక్షల కనెక్షన్లు
సిరిసిల్లలో పైసలు పంచను.. మందు పొయ్యను అని కేటీఆర్ అంటున్నారు. అంత సత్యమంతులే అయితే మీ అభ్యర్థులందరితో తెలంగాణ తల్లి విగ్రహం మీద ప్రమాణం చేయించి అదే మాట చెప్పమనాలి’’ అని డిమాండ్ చేశారు. ‘‘గత బడ్జెట్లో రూ.12 వేల కోట్లు ఇంటి నిర్మాణ పథకం కోసం పెట్టారు. ఆ పైసలు ఎటు పోయినయ్. ఇప్పుడు నిర్మాణ ఖర్చులు రెట్టింపయ్యాక.. ఈ పథకానికి ఇచ్చే సాయాన్ని రూ.5 లక్షల నుంచి రూ.3 లక్షలకు తగ్గించారు.
దళితబంధును హుజూరాబాద్కే పరిమితం చేశారు. క్యారీ ఫార్వర్డ్ పేరిట రూ.40 వేల కోట్లను దుర్వినియోగం చేశారు. ఆ పథకం మీద ఇప్పటికీ క్లారిటీ ఇవ్వలేదు’’ అని మండిపడ్డారు. అమిత్ షా బెత్తం పట్టి ఎట్ల ఆడిస్తే అట్ల ఆడేటోళ్లు బీఆర్ఎస్ నేతలు అని ఆయన విమర్శించారు.
