- బీసీలు అన్ని విషయాల్లోనూ బలపడేలా చూడాలి
- అధికారులకు మంత్రి పొన్నం సూచన
హైదరాబాద్, వెలుగు: బీసీ సంక్షేమ శాఖ లో భవిష్యత్ ప్రగతికి విద్యనే మార్గమని, దానికి ప్రథమ ప్రాధాన్యత కల్పించేలా చర్యలు తీసుకోవాలని అధికారులను ఆ శాఖ మంత్రి పొన్నం ప్రభాకర్ ఆదేశించారు. రాష్ట్ర జనాభాలో వెనుకబడిన తరగతుల వారు 56 శాతం ఉన్నారని మంత్రి తెలిపారు.
వ్యవసాయం, చేతివృత్తులు, సంప్రదాయ వృత్తులకు వెన్నెముకగా నిలుస్తున్నారని, వారి సామాజిక ఆర్థిక పురోగతి రాష్ట్ర వృద్ధికి కీలకమన్నారు. శుక్రవారం మినిస్టర్ క్వార్టర్స్ లో బీసీ సంక్షేమ శాఖ ఉన్నతాధికారులతో మంత్రి పొన్నం సమీక్షా సమావేశం నిర్వహించారు. రాష్ట్ర అభివృద్ధిని ప్రతిబింబించేలా తెలంగాణ రైజింగ్ -2047 పాలసీలో బీసీ సంక్షేమ శాఖలో తీసుకోవాల్సిన అంశాలపై బీసీ గురుకుల సెక్రటరీ సైదులు, అడిషనల్ సెక్రటరీ తిరుపతి, అడిషనల్ డైరెక్టర్ సీఈఓ అలోక్ కుమార్ తో మంత్రి చర్చించారు.
విజన్ 2047 లో బీసీలు విద్యాపరంగా బలంగా, ఆర్థికంగా స్వతంత్రంగా, సామాజికంగా సాధికారత సాధించేలా చూడాలని మంత్రి సూచించారు. ఆవిష్కరణలు, నైపుణ్యాభివృద్ధి, రాష్ట్ర అభివృద్ధికి దోహదపడేలా, పోటీతత్వాన్ని ఎదుర్కునేలా చర్యలు తీసుకోవాలన్నారు. విద్యా ప్రమాణాలను బలోపేతం చేయాలని, హాస్టళ్లను అత్యుత్తమ కేంద్రాలుగా తీర్చిదిద్దాలన్నారు. హైస్కూల్ ఎడ్యుకేషన్ నుంచే డిజిటల్ అక్షరాస్యతపై అవగాహన పెంచాలన్నారు.
రిజర్వేషన్లు పెరిగితేనే బీసీలకు సామాజిక న్యాయం
రిజర్వేషన్లు పెరిగితేనే బీసీలకు సామాజిక న్యాయం జరుగుతుందని బీసీ సంక్షేమ శాఖ మంత్రి పొన్నం ప్రభాకర్ అన్నారు. శుక్రవారం మహాత్మా జ్యోతిరావు పూలే 135వ వర్ధంతి సందర్భంగా బంజారాహిల్స్ లోని ప్రసాద్ ల్యాబ్స్ లో ‘పూలే’ సినిమా ట్రైలర్ అండ్ ఆడియో లాంచ్ కార్యక్రమం జరిగింది.
ఈ కార్యక్రమం లో మంత్రి పొన్నం ప్రభాకర్, ప్రభుత్వ సలహా దారు కె.కేశవరావు, వీహెచ్, బీసీ కమిషన్ చైర్మన్ నిరంజన్, పొన్నం సోదరుడు రవిచంద్ర తదితరులు పాల్గొన్నారు. ఈ సందర్భంగా మంత్రి పొన్నం మాట్లాడుతూ చదువుతోనే ఉన్నత శిఖరాలకు చేరుకోగల మన్నారు. పూలే సినిమాను ప్రజల్లోకి తీసుకెళ్ల డానికి ప్రభుత్వం తరపున సహకారం అందిస్తా మని మంత్రి తెలిపారు. పూలే సినిమా ద్వారా ఆయన ఆశయాలను ప్రజలకు తెలిసేలా కృషి చేస్తున్నా మని నిర్మాత పొన్నం రవిచంద్ర అన్నారు.
