హైదరాబాద్: తెలంగాణ విద్యావ్యవస్థలో సమగ్ర సంస్కరణలు తీసుకొస్తున్నామని మంత్రి శ్రీధర్ బాబు తెలిపారు. అసెంబ్లీలో విద్యా సంస్కరణలపై జరిగిన చర్చ సందర్భంగా ప్రభుత్వం చేపడుతున్న పలు కార్యక్రమాలను ఆయన వివరించారు.
విద్యతో పాటు విద్యార్థుల ఆరోగ్యం, పోషణపై కూడా ప్రభుత్వం ప్రత్యేక దృష్టి సారిస్తోందని మంత్రి తెలిపారు. ఏ ఒక్క విద్యార్థి కూడా ఖాళీ కడుపుతో పాఠశాలకు రాకుండా చర్యలు తీసుకుంటున్నామని చెప్పారు. పాఠశాల విద్యార్థులతో పాటు ఇంటర్ విద్యార్థులకు కూడా మధ్యాహ్న భోజన పథకాన్ని అమలు చేస్తున్నట్లు వెల్లడించారు.
దేశంలోనే తొలిసారిగా ఇంటిగ్రేటెడ్ స్కూల్స్
దేశంలో ఎక్కడా లేని విధంగా రాష్ట్రంలో ఇంటిగ్రేటెడ్ స్కూల్స్ను ఏర్పాటు చేస్తున్నామని శ్రీధర్ బాబు తెలిపారు. ఆధునిక సాంకేతికతకు అనుగుణంగా ఏఐ టెక్నాలజీని ఉపయోగిస్తూ ఇంటిగ్రేటెడ్ స్కూల్స్ను అభివృద్ధి చేస్తున్నామని చెప్పారు.
విద్యార్థులకు మెరుగైన విద్యా వాతావరణం కల్పించడంతో పాటు భవిష్యత్ అవసరాలకు అనుగుణంగా విద్యా విధానాన్ని తీర్చిదిద్దుతున్నామని మంత్రి వివరించారు.
ఇంటర్మీడియట్, పాలిటెక్నిక్ కోర్సుల్లోని పాఠ్యాంశాలను సవరించినట్లు శ్రీధర్ బాబు తెలిపారు. విద్యార్థులకు ప్రస్తుత పరిశ్రమ అవసరాలకు అనుగుణంగా నైపుణ్యాలను అందించేలా విద్యా విధానంలో మార్పులు తీసుకొస్తున్నామని చెప్పారు.
తెలంగాణను డ్రగ్స్ ఫ్రీ రాష్ట్రంగా మార్చేందుకు ప్రభుత్వం చర్యలు తీసుకుంటోందని మంత్రి తెలిపారు. యువతను మత్తు పదార్థాలకు దూరంగా ఉంచడంతో పాటు వారికి మెరుగైన భవిష్యత్తు అందించేందుకు ప్రభుత్వం కృషి చేస్తోందన్నారు.
యంగ్ ఇండియా స్కిల్ యూనివర్సిటీ
యువతలో నైపుణ్యాలను పెంపొందించేందుకు యంగ్ ఇండియా స్కిల్ యూనివర్సిటీని ఏర్పాటు చేసినట్లు శ్రీధర్ బాబు తెలిపారు. విద్యార్థులకు విద్యతో పాటు ఉపాధి అవకాశాలకు అవసరమైన నైపుణ్యాలను అందించడమే ప్రభుత్వ లక్ష్యమని పేర్కొన్నారు.
రాష్ట్రంలో విద్యా వ్యవస్థను ఆధునికీకరించి, విద్యార్థులకు నాణ్యమైన విద్య, పౌష్టికాహారం, నైపుణ్యాభివృద్ధి అందించేలా సమగ్ర విధానాన్ని అమలు చేస్తున్నామని మంత్రి శ్రీధర్ బాబు స్పష్టం చేశారు.
